'საქართველოს პატრიოტთა ალიანსმა' ახალციხეში გამგებლობის კანდიდატი წარადგინა

„დავით თარხან-მოურავი - საქართველოს პატრიოტთა ალიანსის“ ლიდერები ამომრჩევლებს ახალციხის დემოკრატიული ჩართულობის ცენტრში შეხვდნენ.

ჯანმრთელობის დაცვა, ქალთა დასაქმება, სოფლის მეურნეობის განვითარება, გაზიფიცირება, სასმელი წყლისა და საკანალიზაციო სისტემის მოწესრიგება, - იმ პრობლემების ჩამონათვალია, რომლის მოგვარებასაც ახალციხის გამგებლობის კანდიდატი მამუკა გოგოლაძე აპირებს.

„ახლა ვიწყებთ საარჩევნო კამპანიას. მზად ვარ, რომ ჩემი ხალხისთვის დღე და ღამე ვიმუშაო, მივალ ყველა ოჯახში და მათ პრობლემებს და გაჭირვებას გავიზიარებ“, - ამბობს მამუკა გოგოლაძე.

როგორც ალიანსის ლიდერი ერეკლე საღლიანი ამბობს, სასმელი წყლის პრობლემის მოგვარება ახალციხეში, რიგით პირველი პრიორიტეტია.
„ბევრ რამეს ვპირდებით ახალციხელებს. ჩვენი მოძრაობა არის ერთადერთი პოლიტიკური ძალა, რომელიც ითვალისწინებს ხალხის გულისხმას“, - ამბობს ერეკლე საღლიანი.

ალიანსის ახალციხის რაიონული ორგანიზაციის თავმჯდომარემ, თეა სამსონიძემ ახალციხის საკრებულოს მაჟორიტარი კანდიდატები, თემის საკრებულოს მაჟორიტარები და პარტიული სიის პირველი ათეულებიც წარადგინა.

ახალციხის საკრებულოს მაჟორიტარი კანდიდატი და პარტიული სიის პირველი ნომერი თავად თეა სამსონიძეა. შემდეგი ნომრები არიან: ნუგზარ ბექაური, ზაზა კუჭაძე, თემურ თაქთაქიძე, ბეგლარ მიქუტიშვილი, თამარ სამსონიძე, ჯაბა გუდაძე, ნანა კოპაძე, ანი აბაშიძე და მანუშაკ აგახანიანი.



[მანანა სარაშვილი, ახალციხე]