რაში ადანაშაულებენ 'ნაციონალები' 'ოცნებას' – საგანგებო ბრიფინგი

გელა დემეტრაძემ დღეს, 11 ივნისს, საგანგებო ბრიფინგი გამართა, რომელზეც განაცხადა, რომ „ქართულმა ოცნებამ“ ამომრჩევლების მოსყიდვა სხვადასხვა გზებით დაიწყო.

„სახელისუფლებო ძალები მაქსიმალურად იყენებენ ყველა რესურსს იმისთვის, რომ არჩევნები მათთვის დადებითი შედეგით დასრულდეს. მაგალითად, სოფლებში კლდესა და წირაში სასწრაფოდ დაიწყეს გზების რეაბილიტაცია. საქმე იმაშია, რომ ახალციხის მუნიციპალიტეტს არ აქვს გამოცხადებული ტენდერი, რომელიც გულისხმობს ამ ორ სოფელში გზების შეკეთებას. არ ყოფილა არც წვიმა და სეტყვა, რომ გზები დაზიანებულიყო და საჭირო გამხდარიყო აღნიშნული სამუშაოების დაწყება“, – განაცხადა მედიასთან გელა დემეტრაძემ.

ამავე ბრიფინგზე გელა დემეტრაძე გაზეთ „სამხრეთის კარიბჭეში“ გამოქვეყნებულ სტატიას გამოეხმაურა, რომელშიც „ქართული ოცნების“ მერობის კანდიდატი გიორგი კოპაძე ოლეგ სანდროშვილს „ნაციონალებთან“ გარიგებაში ადანაშაულებს.

„ქართული ოცნების“ მერობის კანდიდატი პირდაპირ გვადანაშაულებს, რომ თითქოს ჩვენ ვმართავთ ადგილობრივ ხელისუფლებას და საბოტაჟს აქვს ადგილი. ვითომ ჩვენ გვინდა, რომ მოსახლეობა უარყოფითად განვაწყოთ ხელისუფლების მიმართ. რაში გამოიხატება ის, რომ ჩვენ ვმართავთ დღეს საკრებულოს, რა კონკრეტული იდეით ან პროექტით შევიდნენ, რომელიც დაბლოკა საკრებულომ?!“,–აცხადებს დემეტრაძე.

გელა დემეტრაძე ფიქრობს, რომ მმართველი გუნდი ყველა რესურსს გამოიყენებს არჩევნების მოსაგებად.

„სახელისუფლებო ძალამ იგრძნო მოსახლეობის უარყოფითი განწყობა, ამიტომ არ მოერიდებიან სხვადასხვა გზებით არჩევნების გაყალბებას, მაგალითად, ეგრეთ წოდებული, კარუსელით, ბიულეტენების ჩაყრით და ა.შ. მინდა მივმართო საუბნო კომისიების წევრებს, თავმჯდომარეებს და მათ მოადგილეებს, ეს არის სისხლის სამართლის კოდექსით დასჯადი დანაშაული და ვინც ამ დანაშაულს ჩაიდენს, ყველას თავის დროზე მოეთხოვება პასუხი“, – აცხადებს დემეტრაძე.

ბრიფინგის დასრულების შემდეგ გელა დემეტრაძემ ჟურნალისტებს ფოტო და ვიდეო მასალა გადასცა, რომელზეც სოფელ კლდეში გზის შეკეთების სამუშაოებია ასახული.


ვიდეომასალა, რომელიც ჟურნალისტებს "ნაციონალებმა" მიაწოდეს.

[მანანა სარაშვილი, ახალციხე]