გელა დემეტრაძემ ამომრჩევლებს წინასაარჩევნო პროგრამა გააცნო

ახალციხის მერობის კანდიდატი „ერთიანი ნაციონალური მოძრაობიდან“, გელა დემეტრაძე, ამომრჩევლებს ახალციხის დემოკრატიული ცენტრის ორგანიზებით შეხვდა.

მერობის კანდიდატი ერთი საათის განმავლობაში საუბრობდა წინასაარჩევნო პროგრამაზე, 2010-2012 წლებში (მისი გამგებლობის პერიოდში) ახალციხის მუნიციპალიტეტში განხორციელებულ და განსახორციელებელ პროექტებსა და სამომავლო გეგმებზე.

გელა დემეტრაძე ამბობს, რომ ხელისუფლებაში მოსვლის შემთხვევაში, პირველ რიგში ტურისტული ინფრასტრუქტურის მოწესრიგებასა და ინვესტორების მოზიდვაზე იზრუნებს: „ძველი გამგეობის შენობაში გვინდა, რომ გავაკეთოთ სასტუმრო და სამორინე. გარდა ამისა, ახალციხის ციხეს დიდი პოტენციალი აქვს იმისთვის, რომ განვითარდეს ტურიზმი. ამისთვის უნდა განვახორციელოთ ისეთი პროექტები, რომლითაც დავაინტერესებთ ინვესტორებს“.

გელა დემეტრაძემ 2010-2012 წლებში დაწყებულ და ამ ეტაპზე შეჩერებულ პროექტებზეც გაამახვილა ყურადღება: „საბარგო სადგურზე საკონსერვო ქარხნა, მეორე შახტის ტერიტორაზე მარცვლეულის ტერმინალი და ახალციხის სასაკლაო, რომლის მშენებლობაც დასრულებულია, თუმცა ჯერ არ ფუნქციონირებს, – ის ობიექტებია, რომლის მშენებლობაც შეჩერებულია და გპირდებით, რომ ამ პროექტებს დავასრულებ“.
შეხვედრის მონაწილეები დაინტერესდნენ, რა გეგმები აქვს კანდიდატს ისეთი პრობლემების მოსაგვარებლად, როგორიცაა: გაუმართავი წყალ–საკანალიზაციო სისტემა, ამორტიზებული გზები, დამშრალი ტბა, შეზღუდული შესაძლებლობების მქონე პირებისთვის არადაპტირებული ქალაქი და ა.შ.

„დემოკრატიული ჩართულობის ცენტრში“ განმარტავენ, რომ ამომრჩევლებს მერობის ყველა კანდიდატს შეახვედრებენ.



[მანანა სარაშვილი, ახალციხე]