მესხეთში სამ სკოლას კაპიტალური რემონტი ჩაუტარდება

სკოლები ათასწლეულის გამოწვევა საქართველოს დაფინანსებით რემონტდება. პირველადი საპროექტო სამუშაოების შესასრულებლად ტენდერი კომპანია „ლუის ბერგერმა“ მოიგო.

დღეს, სკოლებში შეხვედრები სსიპ განათლებისა და მეცნიერების ინფორმაციული განვითარებისა და ლუის ბერგერის ერთობლივმა სამუშაო ჯგუფებმა გამართეს. შეხვედრებს სკოლის პედაგოგები, მშობლები, ასევე ადგილობრივი თვითმმართველობის, სამხარეო ადმინისტრაციისა და არასამთავრობო სექტორის წარმომადგენლები ესწრებოდნენ.

შეხვედრების მიზანი პირველადი პროექტების განხილვა, რეკომენდაციების მოსმენა, სკოლებში სარეაბილიტაციო კომიტეტის არჩევა, ასევე ინფორმაციის გაცვლისა და საჩივრების მექანიზმების შესახებ მსჯელობა იყო.

„საქართველოს მასშტაბით 33, მესხეთში კი 3 სკოლა კაპიტალურად გარემონტდება“, - ამბობს კომპანია „ლუის ბერგერის“ პროექტის ასისტენტი ნინო პაატაშვილი.

სავარაუდოდ, სკოლებში სარემონტო სამუშაოები მომავალ წელს დაიწყება. როგორც პაატაშვილი ამბობს, სამუშაოები ზაფხულში, ანუ იმ პერიოდში ჩატარდება, როცა სკოლებში სასწავლო პროცესი შეწყვეტილი იქნება.

„სკოლა სულ უნდა დაიცალოს. თუ სარეაბილიტაციო სამუშაოები სასწავლო პროცესის დაწყებამდე ვერ დასრულდება, მაშინ ალტერნატიული ფართის მოძებნაში განათლების სამინისტრო დაგვეხმარება“, - ამბობს ახალციხის პირველი საჯარო სკოლის დირექტორი მაკა ჯანაშვილი.

მისი თქმით, სკოლა მთლიანად გარემონტდება: „მოეწყობა სავენტილაციო სისტემა, საშხაპეები, ასევე დაცული იქნება ეკოლოგიური ნორმები. სავარაუდოდ, მხოლოდ ჩვენ სკოლაზე მილიონზე მეტი ლარი დაიხარჯება“.

გარდა ბაკურიანისა, ახალციხისა და ადიგენისა, სამცხე-ჯავახეთში სკოლები ჯავახეთის სოფლებში: კარტიკამში, განძასა და იხტილაშიც გარემონტდება.



[თამუნა უჩიძე, ახალციხე]