'ნინო ბურჯანაძე – ერთიანი ოპოზიციის' წარმომადგენლები ხელისუფლების მხრიდან ზეწოლაზე საუბრობენ

პარტიის რეგიონული კოორდინატორი ჯიმშერ გოგოლაური ამბობს, რომ ზეწოლის შედეგად პარტიის 6–მა მაჟორიტარმა კანდიდატურა მოხსნა. გარდა ამისა, ზეწოლა ხორციელდება მერობის კანდიდატზე ზაზა ნათენაძეზე: „ბოლო სამი დღეა პიროვნება შეიცვალა. რა უნდა ვიფიქროთ?! ხორციელდება მასზე ზეწოლები ხელისუფლების მხრიდან“.

აღნიშნულ ფაქტს თავად მერობის კანდიდატი კატეგორიულად უარყოფს და ამბობს, რომ მსგავსი არაფერი ხდება.

„საერთოდ არანაირი ზეწოლა არ არსებობს. სამსახურის გამო ვერ შევძელი შეხვედრაზე მისვლა“, – ამბობს ზაზა ნათენაძე.

წინასაარჩევნო ვითარებაზე სასაუბროდ გუშინ, 3 ივნისს, პარტიას ნინო ბურჯანაძის გუნდის წევრი ირაკლი ბათიაშვილი სტუმრობდა. რაიონული ორგანიზაციის წარმომადგენლებმა ბათიაშვილს მუნიციპალიტეტში წინასაარჩევნო სიტუაცია გააცნეს და იმ პრობლემებზე ისაუბრეს, რაც მათ საარჩევნო აგიტაციის დროს ექმნებათ.

„ვისაუბრეთ იმ პრობლემებზე, რაც ამ რეგიონში გვექმნება. კერძოდ, საუბარია იმ ზეწოლაზე, რასაც ჩვენი კანდიდატები განიცდიან. მაგალითად, ახალციხის რაიონში, 6 უბანზე ამოვარდა ჩვენი კანდიდატი, რის შედეგადაც, ფაქტობრივად ოპოზიციის გარეშე დარჩა „ქართული ოცნება და ამით თვითონვე შეუქმნა თავის თავს პრობლემა“, – განაცხადა ირაკლი ბათიაშვილმა.

[თინათინ ზაზაძე, ახალციხე]