ახალციხის მერობის კანდიდატმა ნატალი სისვაძემ კანდიდატურა მოხსნა

ნატალი სისივაძემ შესაბამისი განცხადებით N37–ე ახალციხის საარჩევნო ოლქს გუშინ, 4 ივნისს, საღამოს მიმართა.

სისვაძე აცხადებს, რომ გადაწყვეტილებას პოლიტიკური სარჩული არ აქვს, უბრალოდ გადაწყვიტა ოპონენტებს დაუთმოს ასპარეზი. თავად რჩება ქალაქში და აპირებს ბოლომდე დაეხმაროს თანაგუნდელებს საარჩევნო ბრძოლაში.

„მე ჩემი წილი პასუხისმგებლობა ახალციხელების წინაშე მაშინ ავიღე, როცა კანდიდატად დამასახელეს. აქედან გამომდინარე, აქ ვრჩები და სამომავლოდ არაერთი აქტივობა მაქვს დაგეგმილი“, – ამბობს მერობის უკვე ყოფილი კანდიდატი და აქვე ამატებს, რომ სურვილის შემთხვევაში მომავალში ითანამშრომლებს გამარჯვებულ კანდიდატთან.

„მე, ნატალი სისვაძემ, როგორც ბლოკი „არასაპარლამენტო ოპოზიცია“ (კუკავა, ჩიხრაძეს) ახალციხის უპარტიო მერობის კანდიდატმა, მივიღე გადაწყვეტილება, მომეხსნა ჩემი კანდიდატურა თვითმმართველობის არჩევნებიდან. ბუნებრივია ჩემს გადაწყვეტილებას სხვადასხვანაირი ინტერპრეტაცია მიეცემა, მინდა ნათლად განვაცხადო, რომ ეს გადაწყვეტილება ჩემია და გარდა საკუთარი სურვილისა, სხვა საფუძველი არ გააჩნია.

ვფიქრობ, ამ საარჩევნო კამპანიამ უდიდესი გამოცდილება შემძინა. კიდევ უფრო ჩამახედა და დამაახლოვა ჩემს თანამოქალაქეთა პრობლემებთან. ამ ეტაპზე საჭიროდ ჩავთვალე გზა დავუთმო ჩემს მეგობრებს, მაგრამ ეს სრულიადაც არ ნიშანვს იმას, რომ მე ვტოვებ საზოგადოებრივ და პოლიტიკურ ასპარეზს. მე ვრჩები ახალციხეში, გამოვთქვამ მზაობას და მჯერა, რომ არჩეულ მერთან შევძლებ ეფექტურ თანამშრომლობას და ბევრ სასიკეთო საქმეს გავაკეთებთ ერთად“, – ნათქვამია საოლქო კომისიაში შეტანილ განცხადებაში.

შეგახსენებთ, ახალციხის მერობისთვის ხუთი კანდიდატი იყო რეგისტრირებული, 4 მამაკაცი და ერთი ქალბატონი. დღეიდან ახალციხის მერობისთვის ბრძოლას ოთხი მამაკაცი გააგრძელებს:ზაზა ნათენაძე – „ნინო ბურჯანაძე – ერთიანი ოპოზიციიდან“, გელა დემეტრაძე – ბლოკ „ერთიანი ნაციონალური მოძრაობიდან“, გოჩა ათოშვილი – „სალომე ზურაბიშვილი – საქართველოს გზიდან“ და გიორგი კოპაძე – ბლოკ „ქართული ოცნებიდან“.

[ნინო ნარიმანიშვილი, მანანა სარაშვილი, ახალციხე]