რატომ მოიხსნა 'ნაციონალების' მაჟორიტარმა კანდიდატურა ახალციხეში

„ერთიანი ნაციონალური მოძრაობის“ მაჟორიტარი დეპუტატობის კანდიდატმა მალხაზ ივანიძემ, რომელიც კენჭს 9 აპრილზე, რუსთაველის ქუჩის ნაწილისა და საბარგო სადგურზე იყრიდა, კანდიდატურა მოიხსნა. ამის შესახებ, ახალციხის მერობის კანდიდატმა „ნაციონალური მოძრაობიდან“ გელა დემეტრაძემ განაცხადა.

მისი თქმით, ივანიძე მასთან ოფისში გუშინ, 20 მაისს, დილით მივიდა: „აფრიაქებული და შეშინებული მეჩვენა. მითხრა, რომ ძალოვანი სტრუქტურებიდან ზეწოლას ვეღარ უძლებდა და კანდიდატურა უნდა მოეხსნა. ვურჩიე კიდევ დაფიქრებულიყო, მაგრამ დღეს უკვე გავიგე, რომ კანდიდატურა მოუხსნია“.

ამის გამო, „ნაციონალურ მოძრაობას“ 37.01.02 უბანზე მაჟრიტარი კანდიდატი აღარ ეყოლება.

„კანდიდატების რეგისტრაციის ვადა დასრულებულია, ამიტომ აქ ბრძოლა კანდიდატის გარეშე მოგვიწევს, - აცხადებს დემეტრაძე და ამატებს, რომ მითი იმის შესახებ, თითქოს ახალციხეში წინასაარჩევნო კამპანია მშვიდ ვითრებაში ხორციელდება, ტყუილია, - რეალურად დიდი ზეწოლები ხორციელდება“.

საწინააღმდეგოს აცხადებს თავად ივანიძე. მისი თქმით, მასზე ზეწოლა არ განხორციელებულა: „ჩემი სურვილით მოვიხსენი კანდიდატურა. ოჯახური პრობლემები შექმნა და იმიტომ“.

კითხვაზე, რატომ არ განაცხადა ამის შესახებ უფრო ადრე და რატომ დატოვა პარტია მაჟორიტარის გარეშე, გვპასუხობს: „საქართველოდან უნდა წავიდე მალე. მეც არ ვიცოდი ასეთი რამ ჩემს გარშემო ასე მალე თუ მოხდებოდა. ცოტა ჯანმრთელობის პრობლემაც მაწუხებს“.

მიუხედავად იმისა, რომ მომხდარს ივანიძე უარყოფს, დემეტრაძე კი ვერ აკონკრეტებს თუ ვისი მხრიდან განხორციელდა ზეწოლა, „სამხრეთის კარიბჭე“ შინაგან საქმეთა სამინისტროსა და მთავარ პროკურატურას დაუკავშირდა.

„მორატორიუმია გამოცხადებული და უმჯობესი იქნებოდა უკეთ აეხსნათ რა და როგორ მოხდა, წინააღმდეგ შემთხვევაში, დემეტრაძის განცხადება გაუგებარია“, - ამბობს მთავარი პროკურატურის პრესსამსახურის წარმომადგენელი თემურ დოლიძე.

კატეგორიულად უარყოფენ რაიმე ზეწოლის მცდელობასაც კი შსს–ში.

დემეტრაძე კი აცხადებს, რომ მომხდარს ინტენსიური სახე ჰქონდა და აღნიშნულის შესახებ განცხადებას ცენტრალური შტაბი გაავრცელებს. ამ დრომდე მას მომხდართან დაკავშირებით უწყებათაშორისი კომისიისთვის არ მიუმართავს.

[თამუნა უჩიძე, ახალციხე]