გაიგე რას ჭამ! –ახალციხეში მომხმარებელთა დახმარების ცენტრი ამოქმედდა

მომხმარებელთა დახმარების ცენტრი რუსთაველის N95–ში ფუნქციონირებს. ცენტრში ამბობენ, რომ ახალციხის მუნიციპალიტეტის მასშტაბით ნებისმიერ მსურველს, ვისაც შეძენილი პროდუქტის ვარგისიანობაში ეჭვი შეეპარება, შეუძლია ცხელ ხაზზე დარეკოს და ცენტრის თანამშრომლებისგან კომპეტენტური რჩევა მიიღოს. ცხელი ხაზის ნომერია 551 555 267, ზარი უფასოა.

მომხმარებლის ზარებს ცენტრის ხელმძღვანელი, ჰიგიენისტი, ეპიდემიოლოგი ეთერ ზედგინიძე უპასუხებს.

„თუ მოგვმართავენ, რომ მათ შეიძინეს პროდუქტი, რომელიც საკვებად უვარგისი იყო და მოწამლა, ჩვენ შევეცდებით დავეხმაროთ კონკრეტულად აღნიშნულმა პროდუქტმა მოწამლა თუ არა. ამავე დროს, შესაბამის ინსტანციებს ჩავაყენებთ საქმის კურსში. ვატყობინებთ სურსათის ეროვნულ საგენტოს და მათი სპეციალისტები იკვლევენ“ – ამბობს ცენტრის ხელმძღვანელი ეთერ ზედგინიძე და ამატებს, რომ ცენტრს შეუძლია მიმართოს მშობელმაც იმ შემთხვევაში, თუ ბავშვთა დაწესებულებებში კვებით მომსახურებასთან დაკავშირებით პრეტენზია ექნება.

მისივე თქმით, ცენტრს შეუძლია მომხმარებელს ინსტრუქტაჟი ჩაუტაროს გენმოდიფიცირებულია თუ არა პროდუქტი, ან აქვს თუ არა რადიაციის ნიშნები. შემოწმდება ეტიკეტიც.

ცენტრში განმარტავენ, რომ მომხმარებლის თხოვნით შესაძლებელია ანალიზის ჩატარებაც, წყალზე ან ნებისმიერ პროდუქტზე, რომლის ვარგისიანობაში მომხმარებელს ეჭვი შეეპარება. ანალიზის თანხას ევრაზიის თანამშრომლეობის ფონდი დაფარავს.

„შეგვიძლია წავიღოთ და შევამოწმოთ თბილისის ჰიგიენის კვლევით ინსტიტუტში და ასევე თბილისში, ორ კერძო ლაბორიატორიაში. იმ პროდუქცუას, რომელზეც მომხმარებელს ეჭვი შეეპარება, ჩვენი სახსრებით ვყიდულობთ“, – განმარტავს ზედგინიძე.

მომხმარებელთა დახმარების ცენტრები პროექტის „ევროკავშირთან დაახლოების გამჭირვალე პროცესი: სანიტარული და ფოტოსანიტარული პოლიტიკა საქართველოსა და მოლდოვაში“ ფარგლებში მუშაობს. აღნიშნული ცენტრები საქართველოს მასშტაბით ოთხ ქალაქში: თბილისში, ქუთაისში, გორსა და ახალციხეშია გახსნილი.

პროექტი ორწლიანია და ევრაზიის თანამშრომლების ფონდი ევროკავშირისა და შვედეთის საერთაშორისო განვითარებისა და თანამშრომლობის სააგანტოს მხარდაჭერით ახორციელებს.

[თინათინ ზაზაძე, ახალციხე]