"პატრიოტთა ალიანსმა" ბორჯომში მერობის კანდიდატი დაასახელა

"საქართველოს პატრიოტთა ალიანსიდან" ბორჯომის მერობისთვის, მუნიციპალიტეტის საკრებულოს თავმჯდომარის თანამდებობიდან ახლად გადამდგარი ზაზა ჩაჩანიძე იბრძოლებს.

კანდიდატი ბორჯომელებს, დღეს, 9 სექტემბერს პარტიის ლიდერებმა დავით თარხან-მოურავმა და ირმა ინაშვილმა ქალაქის ცენტრში წარუდგინეს. მათ საარჩევნო პროგრამასა და პრიორიტეტებზეც ისაუბრეს.

ბორჯომის ცენტრში შეკრებილ მხარდამჭერებს, თავად მერობის კანდიდატმაც მიმართა და საკუთარი პრიორიტეტები გააცნო.

"ჩემი მთავარი პრიორიტეტი ხალხის გვერდით დგომა და მათი პრობლემის გაზიარება იქნება.გამარჯვების შემთხვევაში, ჩვენ ვიმუშავებთ ბიუჯეტის სწორად დაგეგმარებაზე, რადგან ეს იყო ყოველთვის ბორჯომის პრობლემა. ამისთვის კი საჭიროა მოსახლეობის პრობლემების გათვალისწინება და მთავარი პრიორიტეტებს დასახვა.ჩვენი პროგრამის მიხედვით, ყოველ მესამე შეძენილ შვილზე 6 000 ლარით დახმარება იქნება",–აცხადებს "სამხრეთის კარიბჭესთან" საუბარში "პატრიოტთა ალიანსის" ბორჯომის მერობის კანდიდატი ზაზა ჩაჩანიძე.

ზაზა ჩაჩანიძემ ბორჯომის საკრებულოს თავმჯდომარის თანამდებობა მიმდინარე წლის 29 აგვისტოს, განცხადების საფუძველზე დატოვა. იგი ბორჯომის წარმომადგენლობით ორგანოს 2014 წლის 15 ივლისიდან ხელმძღვანელობდა და საკრებულოში "ქართულ ოცნებას" წარმოადგენდა.

[ლუბა გიორგაძე, ბორჯომი]