ახალციხეში მცხოვრები დევნილებისთვის საცხოვრებელი გამოიძებნა

დღეს, 1 ოქტომბერს, რუსთაველის 115-ში მდებარე, ყოფილი სკოლა-ინტერნატის შენობა საქართველოს ოკუპირებული ტერიტორიებიდან იძულებით გადაადგილებულ პირთა, დევნილთა და განსახლების მინისტრის მოადგილემ მამუკა ცოტნიაშვილმა დაათვალიერა.

მისი განმარტებით, შენობის სარეაბილიტაციო სამუშაოები ახლო მომავალში დაიწყება.

„ეს ნიშნავს იმას, რომ უახლოეს მომავალში ახალციხეში დევნილების ფართებით დაკმაყოფილების თემა ამოიწურება. მათი გარკვეული ნაწილი უკვე დაკმაყოფილებულია, დანარჩენს ახლა დავაკმაყოფილებთ“,- ამბობს ცოტნიაშვილი.

ახალციხის მუნიციპალიტეტში 79 დევნილი ოჯახია რეგისტრირებული, აქედან, საცხოვრებელი ფართი მხოლოდ 17-ს აქვს დაკანონებული. აღნიშნულ ფართში დანარჩენ ოჯახებს შეასახლებენ.

ამ ეტაპზე ყოფილი სკოლა ინტერნატის შენობაში აფხაზეთიდან დევნილი 4 ოჯახი ცხოვრობს.

„ძალიან კმაყოფილები ვართ, საკუთარი ჭერი გვექნება, ამაზე კარგს ვერაფერს გაგვიკეთებენ. შენობას ნამდვილად ესაჭიროება რეაბილიტაცია“,- ამბობს თემურ ობოლაშვილი. ობოლაშვილების სამსულიანი ოჯახი აღნიშნულ შენობაში 20 წელიწადია ცხოვრობს.

ახალციხის მუნიციპალიტეტის გამგებლის ბესიკ ბლიაძის თქმით, ახალციხის მუნიციპალიტეტში მცხოვრები დევნილები მზრუნველობის ქვეშ ყოველთვის იყვნენ, ახლა მათი ძირითადი პრობლემაც გადაიჭრება.

„მათთვის საახალწლოდ და სააღდგომოდ დახმარება ყოველთვის გვქონდა. სამხატვრო და სამუსიკო სკოლებში უფასოდ სწავლობენ, მათთვის უფასო იყო საბავშო ბაღებიც“,- ამბობს ბესიკ ბლიაძე.

მინისტრის მოადგილე ახალციხის მუნიციპალიტეტის გამგებლთან ბესიკ ბლიაძესთან ერთად დევნილთა სავალდებულო რეგისტრაციის პროცესსაც დაესწრო და რეგისტრაციისთვის მისულ დევნილებს გაესაუბრა.



[მანანა სარაშვილი, ახალციხე]