რა იცვლება თვითმმართველობაში – საინფორმაციო შეხვედრა ახალციხეში

შეხვედრა, „სამოქალაქო კულტურის საერთაშორისო ცენტრის“ ორგანიზებით, USAD-ის ეგიდით მიმდინარე პროექტის, „დემოკრატიული მმართველობა საქართველოს“ პროგრამის ფარგლებში მოეწყო.

დისკუსიას ახალციხის მუნიციპალიტეტის საჯარო სკოლებისა და სკოლამდელი აღზრდის დაწესებულებების პედაგოგები, სკოლის მოსწავლეები და სამცხე–ჯავახეთის სახელმწიფო უნივერსიტეტის სტუდენტები ესწრებოდნენ. თვითმმართველობის კოდექსში შესული ცვლილებები დამსწრეებს „სამოქალაქო კულტურის საერთაშორისო ცენტრის“ წარმომადგენელმა კოტე კანდელაკმა გააცნო.

„მოსახლოებამ უნდა იცოდეს რა ახალი რეალობის წინაშე დგება ადგილობრივი თვითმმართველობა. მათ უნდა იცოდნენ ვინ უნდა აირჩიონ“, - ამბობს „სამოქალაქო კულტურის საერთაშორისო ცენტრის“ ექსპერტი მახარე მაცუკატოვი.

თვითმმართველობის კოდექსში შესული ცვლილებების პრეზენტაციის დასრულების შემდეგ, შეხვედრა კითხვა-პასუხის რეჟიმში გაგრძელდა. მონაწილეებს აინტერესებდათ როგორ გაიმიჯნება მერისა და გამგებლის უფლებამოსილებები, როგორ უნდა აირჩიონ საკრებულოს წევრები, მერი, გამგებლები და რა კომპეტენციები ექნება თვითმმართველობას არჩევნების შემდეგ.

„მათ ასევე დააინტერესდათ როგორ უნდა ჩამოყალიბდეს საკონსულტაციო საბჭო, რომელიც გუბერნატორის აპარატში შეიქმნება, ვინ იქნებიან წევრები და რა უფლება-მოვალეობები ექნებათ“,- ამბობს კანდელაკი.

საინფორმაციო შეხვედრები სამცხე-ჯავახეთიდან დაიწყო. პროექტის ფარგლებში მსგავსი შეხვედრა 26 ქალაქში გაიმართება.



[მანანა სარაშვილი, ახალციხე]