მომავლის თვითმმართველობა

საქართველოს რეგიონული განვითარებისა და ინფრასტრუქტურის მინისტრის მოადგილე თენგიზ შერგელაშვილი სამცხე-ჯავახეთის არასამთავრობო სექტორისა და მედიის წარმომადგენლებს შეხვდა.

შეხვედრა სამოქალაქო კულტურის საერთაშორისო ცენტრი ფონდ ”ღია საზოგადოება-საქართველო” პროექტის სამოქალაქო საზოგადოება დეცენტრალიზაციისათვის ფარგლებში, ახალციხის დემოკრატიული ჩართულობის ცენტრში გაიმართა.

საქართველოს რეგიონული განვითარებისა და ინფრასტრუქტურის მინისტრის მოადგილემ, თენგიზ შერგელაშვილმა შეხვედრის მონაწილეებს დეცენტრალიზაციისა და თვითმმართველობის განვითარების სტრატეგიის ძირითადი პრინციპები და მიმართულებები გააცნო. მისი თქმით, აღნიშნული რეფორმის ძირითადი პრინციპია მოქალაქეების მაქსიმალური გააქტიურება და უშუალო ჩართულობა მართვის პროცესში.

- ”პირველ ეტაპზე მუნიციპალური რგოლის ოპტიმიზაცია მოხდება, ფუნქციური, ფინანსური და ტერიტორიული თვალსაზრისით. ასევე, სამხარეო დონეზე თვითმმართველობის ელემენტების შეტანა. გარდა ამისა, თითოეულ სოფელში შეიქმნება საზოგადოებრივი თვითმმართველობა”, - აღნიშნა თენგიზ შერგელაშვილმა.

სამოქალაქო კულტურის საერთაშორისო ცენტრის ხელმძღვანელის კოტე კანდელაკის თქმით, საზოგადოებრივი თვითმმართველობის შექმნა განსაკუთრებით მნიშვნელოვანია. თუმცა, ეს არ არის საჯარო ხელისუფლების ორგანო, ეს არის მოქალაქეთა მონაწილეობის ინსტრუმენტი.

- ”თვითმმართველობის რეფორმის შედეგად თითოეულ ქალაქში დაგეგმილია მუნიციპალური თვითმმართველობის დანერგვა და სასოფლო თემებში თვითმმართველობის ორგანოს არჩევა. რაც შეეხება სამხარეო დონეს, აქაც სიახლეა. ანუ ცენტრის მიერ დანიშნული რწმუნებულის ინსტიტუტი გაუქმდება და სამხარეო დონეზე წარმომადგენლობითი საბჭო იქნება, რომლის წევრებიც თითოეული მუნიციპალიტეტიდან წარგზავნილი დეპუტატები იქნებიან, ხოლო რწმუნებულს დაერქმევა ადმინისტრაციის ხელმძღვანელი”, - განმარტავს კოტე კანდელაკი და ამატებს, რომ ადმინისტრაციის ხელმძღვანელის თანამდებობაზე სამხარეო საბჭო სამ კანდიდატს აირჩევს, ამ სამიდან ერთ-ერთს კი საქართველოს მთავრობა დაამტკიცებს.

ძირითად საკანონმდებლო ცვლილებებს საქართველოს მთავრობა, საქართველოს პარლამენტთან ერთად 2013 წელს განახორციელებს. 2013-2014 წლებში სხვადასხვა სამართლებრივი, ტექნიკური და ორგანიზაციული ღონისძიებები გატარდება.

- ”მიმდინარეობს აქტიური განხილვები, როგორც ადგილობრივი თვითმმართველობის წარმომადგენლებთან, ასევე სამოქალაქო საზოგადოების წარმომადგენლებთან და ექსპერტებთან. პარალელურად მიმდინარეობს კანონპროექტების მომზადების პროცესი და დღევანდელი შეხვედრაც ამ პროცესის ერთ-ერთი ნაწილი იყო”, - განაცხადა თენგიზ შერგელაშვილმა.

მსგავსი შეხვედრები საქართველოს თითქმის ყველა რეგიონში იმართება.

[თამარ თოთაძე, ახალციხე]