სხვილისში საბავშვო ბაღი გაიხსნა

არასამთავრობო ორგანიზაციების Mercy Corps-ის, Worls Vision-ის, SDC-ისა და ადგილობრივი თვითმმართველობის ხელშეწყობით სოფელ სხვილისში საბავშვო ბაღი დაიწყებს ფუნქციონირებას. გახსნის ცერემონიას არასამთავრობო ორგანიზაციების, ახალციხის მუნიციპალიტეტის გამგეობისა და საკრებულოს წარმომადგენლები და ადგილობრივი მოსახლეობა ესწრებოდა.

ადგილობრივები ამბობენ, რომ დახმარებისთვის არასამთავრობო ორგანიზაცია Worls Vision-ს მიმართეს, რადგან სოფელში არსებული ყოფილი საბავშვო ბაღის შენობის რეაბილიტაცია განეხორციელებინათ.

”ჩვენ გადავწყვიტეთ რომ ”სამხარეო განვითარების პროგრამის” ფარგლებში დაგვეწყო სამუშაოები, თუმცა ჩვენი ორგანიზაციის მიდგომაა, რომ საქმე მარტო არ ვაკეთოთ. ამიტომ შემოვიერთეთ პარტნიორი ორგანიზაციები Mercy Corps-ი და SDC, ასევე ადგილობრივი ხელისუფლება, რომლებიც ბაღის რეაბილიტაციაში დაგვეხმარნენ”, - Worls Vision-ის პროგრამების ხელმძღვანელი ნანა ბერძენიშვილი.

დაახლოებით რვა თვის წინ სხვილისის საბავშვო ბაღის რეაბილიტაციისთვის ახალციხის მუნიციპალიტეტის ბიუჯეტიდან 20 000 ლარი გამოიყო.

”ჩემი გამგებლობის პერიოდში დაიწყო ეს პროექტი და მინდა ადგილობრივ მოსახლეობას ახალი ბაღის გახსნა მივულოცო. ეს არის პირველი ბაღი ახალციხის მუნიციპალიტეტის სოფლებში, რომლის დაფინანსებაშიც ადგილობრივი ხელისუფლება მონაწილეობდა”, - განაცხადა ახალალციხის მუნიციპალიტეტის ყოფილმა გამგებელი გელა დემეტრაძემ.

არასამთავრებო ორგანიზაცია Mercy Corps-ი საბავშვო ბაღს ინვენტარით დაეხმარა.

”ნამდვილად კარგი პროექტია. ჩვენმა ორგანიზაციამ საბავშვო ბაღის სამზარეულოსა და საკლასო ოთახებისთვის ინვენტარი შეიძინა”, - განმარტავს Mercy Corps-ის გენდერული თანასწორობის კოორდინატორი ნინო ლომიძე.

განამხლებულმა საბავშვო ბაღმა ფუნქციონირება პირველი აპრილიდან დაიწყო. სადაც 12 ადამიანია დასაქმებული და ამ ეტაპზე 48 ბავშვი დადის.

”ამ ბაღის გახსნა ძალიან მნიშვნელოვანი იყო სოფლისთვის, რადგან აქ ეთნიკურად მრავალეროვანი მოსახლეობა ცხოვრობს. ამიტომ აქ ბავშვები ქართულ ენას შეისწავლიან. ამ ეტაპზე 48 ბავშვი გვყავს და კიდევ ორის მიღება შეგვიძლია”, - ამბობს სხვილისის საბავშვო ბაღის მენეჯერი თინათინ ხუციშვილი.

საბავშო ბაღის ეზოში არასამთავრებო ორგანიზაციების და მუნიციპალიტეტის წარმომადგენლებმა სიმბოლურად ხეები დარგეს.

[ნუკა სტეფნაძე, ახალციხე]