„ქალები წარსულიდან“ – გამოფენა ახალციხეში

„ქალები წარსულიდან“ – ასე ერქვა გამოფენას, რომელიც ახალციხის „დემოკრატიული ჩართულობის ცენტრში“ მედიის განვითარების ფონდმა მოაწყო.

გამოფენაზე წარმოდგენილი ექსპონატები საქართველოს დემოკრატიული რესპუბლიკის დამფუძნებელი კრების წევრი ქალების, ასევე სხვა ისტორიული პირების (მარიამ გარიყული, ეკატერინე გაბაშვილი, კატო მიქელაძე, ნინო ყიფიანი, ბარბარე ყიფიანი და სხვა) საზოგადოებრივ აქტივობას ასახავდა.

გამოფენა პროექტის – „ლიდერი ქალები პოლიტიკური მმართველობისთვის“– ფარგლებში მოეწყო, რომელსაც მედიის განვითარების ფონდი საარჩევნო სისტემების განვითარების, რეფორმებისა და სწავლების ცენტრის მხარდაჭერით ახორციელებს.

„პროექტის მიზანია ქალები დაინტერესდნენ პოლიტიკური ცხოვრებით. ეს გამოფენა კი აჩვენებს, რომ ჯერ კიდევ საუკუნის წინ, საქართველოს ამის ძალიან დიდი ტრადიცია ჰქონდა. ჩვენ ამ ისტორიის გამგრძელებლები ვართ“, - ამბობს მედიის განვითარების ფონდის გამგეობის თავმჯდომარე თამარ კინწურაშვილი.

ლიდერი ქალების წასახალისებლად და აღმოსაჩენად, პროექტში კიდევ ერთი კომპონენტია ჩადებული. მედიის განვითარების ფონდს გამოცხადებული აქვს კონკურსი ბლოგერებისთვის „ჩემი ლიდერი ქალი“.

„გააცანი შენი სოფლის, ქალაქის, რაიონის ლიდერი ქალი მთელ საქართველოს. დაწერე ან გადაიღე ვიდეო ბლოგი - ერთი ლიდერი ქალის შესახებ, რომლის საქმიანობაც ადგილზე ცვლილებებს და ქვეყნის დემოკრატიულ განვითარებას უწყობს ხელს“, – ასეთია კონკურსის პირობა. კონკურსს 20 გამარჯვებული ეყოლება: 10 საუკეთესო ბლოგის ავტორი და 10 ლიდერი ქალი.

„ისტორია არის კარგი საშუალება იმისთვის, რომ საზოგადოება გააქტიურდეს და შეცვალოს გარემო“, – ამბობს თამარ კინწურაშვილი.

მედიის გავითარების პროექტის ფარგლებში გამოიცა წიგნიც სახელწოდებით – „ქალები წარსულიდან“. ნაშრომი მოგვითხორობს რას წერდნენ ქართული გაზეთები ქალებზე და გვაცნობს საქართველოს ეროვნულ არქივში დაცულ უნიკალურ ჩანაწერებს

„წიგნში ასახულია არამარტო ქართველი, არამედ ევროპელი ქალების ისტორია. განსაკუთრებით საინტერესოა ევროპელი მოგზაურის კარლა სერენას ბიოგრაფია, რომელიც ახალციხეშიც იმყოფებოდა და აღწერა რაბათის ისტორია“, – ამბობს თამარ კინწურაშვილი.



[მანანა სარაშვილი, ახალციხე]