სამცხე–ჯავახეთს 3 „ლიდერი ქალი“ ჰყავს

„ჩემი ლიდერი ქალი“- ასე ერქვა კონკურსს, რომელიც „მედიის განვითარების ფონდმა“ საქართველოს სხვადასხვა კუთხეებში მცხოვრები ლიდერი ქალების გამოსავლენად გამოაცხადა. კონკურსის მონაწილეებს უნდა შეექმნათ ბლოგები ქვეყნის სხვადასხვა რეგიონში მცხოვრებ ლიდერ ქალებზე, ტექსტის, ვიდეოს ან ფოტოს სახით.

10 გამარჯვებული ავტორი და 10 ლიდერი ქალი „მედიის განვითარების ფონდმა“ 19 ივნისს, თბილისში დააჯილდოვა.

„მედიის განვითარების ფონდში“ ამბობენ, რომ კონკურსის მიზანი დემოკრატიულ მმართველობასა და გადაწყვეტილებების მიღების პროცესში ქალთა ჩართულობის გაზრდა და ლიდერი ქალების გამოვლენა იყო.

„ბავშვობაში მინდოდა ექიმი ვყოფილიყავი, ფაქტობრივად ვარ კიდეც ექიმი, ვეხმარები ყველას, ვისაც ეს სჭირდება, არ აქვს მნიშვნელობა რა კუთხით – ვთვლი, რომ ეს ჩემი მისიაა და ვახორციელებ“, – ამბობს მარინა მოდებაძე, „სამცხე–ჯავახეთის დემოკრატ ქალთა საზოგადოების“ თავმჯდომარე, ლიდერი ქალი ახალციხიდან, რომელზეც ბლოგი ნინო ნარიმანიშვილმა მოამზადა.

„სათქმელია რამე – თქვი, ორგანიზებაა საჭირო – გაუკეთე ორგანიზება, მოსათხოვია რამე – მოითხოვე. სხვა ადამიანებს შესაძლებლობების კარი უნდა გაუხსნა, ხოლო ისინი მათ როგორ გამოიყენებენ, ან საერთოდ, გამოიყენებენ თუ არა, ეს მათი არჩევანია. მე ადამიანი ვარ, და არა სიმბოლო, არც ძეგლი, არც პლაკატი. მე შემიძლია მივიღო გადაწყვეტილება და მასზე ვაგო პასუხი“, – ეს ამონარიდია ახალქალაქში მცხოვრები ლიდერი ქალის, სედა მელქუმიანის შესახებ რაფიკ აბაჯიანის მომზადებული ბლოგიდან.

მესამე ლიდერი ქალი ნინოწმინდელი კარმენ ოვსეპიანია. მასზე ბლოგი ასევე ნინოწმინდის მკვიდრმა ნინა მარიკიანმა მოამზადა. ნინაც და კარმენიც 4+1 პროგრამით, თბილისში სწავლობენ. ნინა ილიას სახელმწიფო უნივერსიტეტში, კარმენი კი თბილისის სახელმწიფო სამედიცინო უნივერსიტეტში.
კარმენი სოფლის სკოლაში, სადაც თვითონ სწავლობდა, ბიოლოგიის დამატებით გაკვეთილებს ატარებს. გარდა პედაგოგიური საქმიანობისა, ის საზოგადოებრივი აქტივობებითაცაა დაკავებული: სკოლის ბავშვებთან ერთად დაასუფთავა სოფლის რვა სასმელი წყლის წყარო, სადაც მოსახლეობა ნაგავს ყრიდა. ამბობს, რომ სწავლის დამთავრების შემდეგ აპირებს დაბრუნდეს სოფელში და თავისი ცოდნა სოფლის მოსახლეობის ჯანმრთელობისა და განვითარებისთვის გამოიყენოს.

გამარჯვებული ლიდერებიც და ავტორებიც, მედიის განვითარების ფონდმა სერტიფიკატებითა და ციფრული ტექნიკით დააჯილდოვა.

[ნინო ნარიმანიშვილი, თბილისი]