18–წლიანი პაუზის შემდეგ, ვალეში კულტურული ცხოვრება აღდგა

ვალის კულტურის სახლის მენეჯერი გოჩა დემეტრაძე, რომელიც სამსახურში „სამხრეთის კარიბჭეს“ სტატიის შემდეგ აღადგინეს, ამბობს, რომ შემოქმედებითი ჯგუფი სპექტაკლზე ერთი თვე მუშაობდა.

„ნაისი არახამია, დათო მუმლაძე, ნათია სამსონიძე და ლექსო ხითარიშვილი სცენის მოყვარეები არიან. მაყურებელს რაფიელ ერისთავის ნაწარმოების მიხედვით ორი სპექტაკლი: „ძუნწი“ და „ეჭვიანი“ ვაჩვენეთ, ორი პიესა ერთად ვითამაშეთ“, – ამბობს ვალის კულტურის სახლის მენეჯერი გოჩა დემეტრაძე და ამატებს, რომ ვინაიდან სპექტაკლის დასადგმელად დაწესებულებას დაფინანსება არ აქვს, სასცენო კოსტუმები მესხეთის (ახალციხის) პროფესიული თეატრისგან ითხოვეს. დეკორაციებზე კი თავად გოჩა დემეტრაძემ იმუშავა.

„სპექტაკლზე დასწრება თავისუფალი იყო, ექვსასი ადამიანი იყო დარბაზში, 70–80 წლის ადამიანები იყვნენ, დარბაზიდან მეუბნებოდნენ, სცენაზე მოგვენატრე და იმიტომ მოვედითო. 98 წლის მერე ვალეში ადგილობრივი ძალების მიერ ჩატარებული სპექტაკლი აღარ მინახავს“, – ამბობს იგი.

მიმდინარე წლის აგვისტომდე ვალეს კულტურის სახლში კიდევ სამი სპექტაკლის დადგმაა დაგეგმილი.

გოჩა დემეტრაძე ვალეს კულტურის სახლიდან 18 წლის წინ გაათავისუფლეს. ამბობს, რომ მას შემდეგ კულტურის სახლში შემოქმედებითი საქმიანობა შეწყდა. ამ ხნის განმავლობაში დემეტრაძე სამსახურში დაბრუნებას ცდილობდა. კულტურის სახლის მენეჯერად იგი მიმდინარე წლის იანვარში დაინიშნა.

„მას შემდეგ, რაც კულტურის დაწესებულებათა გაერთიანების დირექტორად დავინიშნე, დავაკვირდი ვალის კულტურის სახლის მუშოაბას. არაფერი არ გაკეთდა, ერთხელ, ორჯერ, სამჯერ, ამიტომ გადავწყვიტეთ შეგვეცვალა ხელძღვანელი. გარდა ამისა, ყოფილი მენეჯერი არასპეციალისტი, განათლებით მედდა იყო“, – განმარტავს ახალციხის მუნიციპალიტეტის კულტურის დაწესებულებათა გაერთიანების დირექტორი გიორგი ჟუჟუნაძე.

ამ ეტაპზე კულტურის სახლში შვიდი თანამშრომელია. დაწესებულებაში სამი წრეა გახსნილი: ქორეოგრაფიული, გოგონათა ქორეოგრაფიული და სამეჯლისო ცეკვების. წრეები ფასიანია.

[თამარ თოთაძე, ახალციხე]