გარდა ამისა, სიგელი და აიპედი ერგო "სამხრეთის კარიბჭეს" სარედაქციო სტატიას "რელიგიური ტოლერანტობა და "პატიმარი მინარეთი" კონკურსში - "ტოლერანტობა და მრავალაფეროვნება", მოპოვებული მეორე ადგილისთვის.
საქართველოს სახალხო დამცველთან არსებულმა ტოლერანტობის ცენტრმა დღეს, 15 ნოემბერს,ტოლერანტობის საერთაშორისო დღე აღნიშნა და "ტოლერანტობის ქომაგი" მედია-საშუალებები, ორგანიზაციები და პიროვნებები დააჯილდოვა.
ღონისძიება სასტუმრო "ქორთიარდ მარიოტში" გაიმარა. დაჯილდოების ცერემონიალის დაწყებამდე, ტოლერანტობის ცენტრის ხელმძღვანელმა ბექა მინდიაშვლმა საქართველოში მცხოვრები ეთნიკური და რელიგიური უმცირესობების უფლებრივი მდგომარეობა მიმოხილა და ამ კუთხით არსებულ მთავარ პრობლემებზე ისაუბრა.
დღევანდელ ღონისძიებაზე სახალხო დამცველთან არსებულმა ეთნიკურ და რელიგიურ უმცირესობათა საბჭოებმა "ტოლერანტობის ქომაგი" მედია-საშუალებები გამოვლინეს. რელიგიათა საბჭომ ეს ტიტული წელს "სამხრეთის კარიბჭესა" და "კახეთის საინფორმაციო ცენტრს" მიანიჭა.
დღესვე გამოვლინდნენ კონკურსში "ტოლერანტობა და მრავალფეროვნება" გამარჯვებულებიც. აღნიშნულ კონკურსზე წარდგენილი ათი სტატიიდან, ტოლერანტობის ცენტრმა პირველ, მეორე და მესამე ადგილზე გასული ჟურნალისტები სიგელებითა და ფასიანი საჩუქრებით დააჯილდოვა.
კონკურსში "ტოლერანტობა და მრავალფეროვნება" პირველი ადგილი რადიო თავისუფლების ჟურნალისტს ეკა ქევანიშვილს ერგო სტატიისთვის "ლოცვის უფლება ყველას აქვს". მეორე ადგილის მფლობელი გახდა "სამხრეთის კარიბჭეს" ჟურნალისტების მიერ მომზადებული სტატია
"რელიგიური ტოლერანტობა და "პატიმარი მინარეთი" . მესამე ადგილი კი გაზეთ "ბათუმელების" ჟურნალისტს, ლელა დუმბაძეს ერგო, სტატიისთვის "თურქეთის და სხვა ქვეყნის მოქალაქეები საქართველოში" მიიღო.
კონკურსში მონაწილეობისთვის სიგელი ერგო ათივე სტატიის ავტორს. მათ შორის, "სამხრეთის კარიბჭეს" ჟურნალისტს თამუნა უჩიძეს, რომელსაც კონკურსში გაგზავნილი ჰქონდა სტატია "ბაპტისტები მესხეთში, ნათქვამი და რეალობა".
"ტოლერანტობის ქომაგის" წოდება ერგოთ არასამთავრობო ორგანიზაციებსა და პიროვნებებსაც. რელიგიათა საბჭომ ეს წოდება იურისტს, უფლებადამცველს თამარ გურჩიანს, ადამიანის უფლებების სწავლებისა და მონიტორინგის ცენტრს (EMC) და საქართველოს დემოკრატიულ ინიციატივას (GDI) მიანიჭა. ეროვნულ უმცირესობათა საბჭომ კი დააჯილდოვა კონფლიქტების და მოლაპარაკებების საერთაშორისო კვლევითი ცენტრის ხელმძღვანელი გიორგი ხუციშვილი - ჯილდო გადაეცა მის მეუღლეს- ნინო ციხისთავს, საქართველოს ახალგაზრდა იურისტთა ასოციაცია და გაზეთი „ვეჩერნი ტბილისი“.
ღონისძიებას, რომელიც სახალხო დამცველთან არსებული ტოლერანტობის ცენტრის ორგანიზებით გაიმართა, ესწრებოდნენ დიპლომატიური მისიების, საერთაშორისო და არასამთავრობო ორგანიზაციების და რელიგიათა და ეთნიკურ უმცირესობათა საბჭოების წარმომადგენლები.
ტოლერანტობის საერთაშორისო დღე ყოველწლიურად აღინიშნება, როგორც კულტურებსა და ცივილიზაციებს შორის პატივისცემის, დიალოგისა და თანამშრომლობის აუცილებლობის შეხსენება. ტოლერანტობის დღის აღნიშვნა 1996 წელს გაეროს გენერალური ასამბლეის ინიციატივით დაიწყო. 1995 წლის 16 ნოემბერს იუნესკომ ტოლერანტობის პრინციპების შესახებ დეკლარაცია მიიღო.
[sknews.ge]