„რელიგიები და ეთნოსები საქართველოში“–ტოლერანტობის ცენტრმა ახალციხეში ვიქტორინა ჩაატარა

ვიქტორინა ახალციხეში დღეს, 11 მარტს ჩატარდა, რომელშიც მონაწილეობა ათმა გუნდმა მიიღო, აქედან 5 გუნდი ახალიციხიდან იყო, 4 ახალქალაქიდან, 1 კი ნინოწმინდიდან.

გამარჯვებული გუნდის გამოსავლენად დამატებითი რაუნდის ჩატარება გახდა საჭირო, საბოლოოდ გამარჯვება ახალციხის N3 გუნდმა მოიპოვა, მათ საჩუქრად პლანშეტები გადაეცათ, ასევე პლანშეტებით დასაჩუქრდა ორი გამორჩეული მოთამაშე, რომელთა გუნდი ფინალში გადავიდა, თუმცა დამარცხდა.

„დღევანდელი ვიქტორინა გამორჩეულია, რადგან პირვალდ გაიმართა ახალციხეში. ასევე მნიშვნელოვანია, რომ ვიქტორინაში მონაწილეობას პირველად იღებენ ეთნიკურად სომეხი მოსწავლეები.მათ ძალიან კარგად იასპარეზეს და ურთულესი მასალა ქართულ ენაზე შესანიშნავად დაძლიეს“, – განაცხადა სახალხო დამცველთან არსებული ტოლერანტობის ცენტრის ხელმძღვანელმა ბექა მინდიაშვილმა.
ვიქტორინის მონაწილეებს კითხვებზე პასუხები სახალხო დამცველთან არსებულმა ტოლერანტობის ცენტრის მიერ 2008 წელს გამოცემული წიგნების „რელიგიები საქართველოში და „ეთნოსები საქართველოში“ მიხედვით უნდა გაეცათ. ახალგაზრდებს მოსამზადებლად ოთხი თვე ქონდათ.

პუბლიკაციებში ასახულია საქართველოში არსებული ყველა ეთნოსისა და რელიგიური გაერთიანების ისტორია, კულტურა და თანამედროვე ყოფა. ვიქტორინა სწორედ ამ წიგნებში ასახულ მასალებს ეფუძნება და მათ პოპულარიზაციას ისახავს მიზნად. ვიქტორინის მიზანი სკოლის მოსწავლეთა შორის საქართველოს რელიგიური და ეთნიკური მრავალფეროვნების შესახებ ცნობიერების ამაღლება და ტოლერანტული გარემოს შექმნის ხელშეწყობაა.

აღნიშნული ვიქტორინა 2010 წლიდან ყოველწიურად იმართება.

ღონისძიება აშშ–ის საერთაშორისო განვითარების სააგენტოს (USAID) მიერ დაფინანსებული საქართველოს გაეროს ასოციაციის (UNAG) პროექტის „ტოლერანტობის, სამოქალაქო ცნობიერებისა და ინტეგრაციის მხარდაჭერის პროგრამის“ (PITA) ფარგლებში ჩატარდა.



[თინათინ ზაზაძე, ახალციხე]