რა ბედი ელის გუბერნიაში დარჩენილ სამ ვაკანტურ პოსტს?

სახელმწიფო რწმუნებულის-გუბერნატორის ადმინისტრაციის ადგილობრივი თვითმმართველობის ორგანოებთან ურთიერთობის სამსახურში კომისიას ორი უფროსი სპეციალისტი უნდა შეერჩია, თუმცა, მხოლოდ ერთი კანდიდატი შეირჩა. ასევე ვერ შეარჩიეს კანდიდატი რეგიონული პროექტების კოორდინირების სამსახურის მთავარი სპეციალისტისა და უფროსი სპეციალისტის ვაკანსიებზე.

სამცხე-ჯავახეთის რწმუნებულის-გუბერნატორის აპარატის უფროსის გიორგი მიქელაძის თქმით, როდის გამოცხადდება კონკურსი ამ სამ ვაკანსიაზე ჯერ არაა ცნობილი. აღნიშნულ პოზიციებზე ამ ეტაპზე არც მოვალეობის შემსრულებლები დანიშნულან.

შეგახსენებთ, კომისიის ერთ-ერთი წევრი ვლადიმერ ზედგინიძე, „სამხრეთის კარიბჭესთან“ აცხადებდა, რომ კონკურსანტების ნაწილი გასაუბრებაზე მოუმზადებელი მიდიოდა, რის გამოც, კომისიას კადრების შერჩევა გაუჭირდა.

[თამარ თოთაძე, ახალციხე]