ადიგენის თვითმმართველობაში გასაუბრების მეორე ეტაპზე კონკურსანტთა ნახევარი არ გამოცხადდა

დღეს, 13 მარტს, ადიგენის თვითმმართველობაში გასაუბრება იმ კანდიდატებმა გაიარეს, რომელთაც განაცხადი შეტანილი ჰქონდათ ეკონომიკისა და ინფრასტრუქტურის სამსახურის მთავარი სპეციალისტისა და სივრცით-ტერიტორიული მოწყობის სპეციალისტის, ასევე ლელოვნის ტერიტორიული ორგანოს რწმუნებულის თანაშემწისა და გორგულის ტერიტორიული ორგანოს რწმუნებულის პოზიციებზე.

როგორც საკონკურსო-საატესტაციო კომისიის თავმჯდომარე თემურ ფეიქრიშვილი განმარტავს, აღნიშნულ ვაკანსიებზე 29 განაცხადი იყო შესული, გასაუბრება კი 16-მა აპლიკანტმა გაიარა.

გორგულის ტერიტორიული ორგანოს რწმუნებულის ვაკანსიაზე 13 განაცხადი იყო შესული, გასაუბრებაზე 7 აპლიკანტი გამოცხადდა; 2 განაცხადი იყო შესული ლელოვნის ტერიტორიული ორგანოს რწმუნებულის თანაშემწის პოზიციაზე და გასაუბრება ორივე განმცხადებელმა გაიარა; მხოლოდ ერთი გამოცხადდა ეკონომიკისა და ინფრასტრუქტურის სამსახურის მთავარი სპეციალისტის პოსტის დაკავების ექვსი მსურველიდან და 6-მა გაიარა გასაუბრება სივრცით-ტერიტორიული მოწყობის სპეციალისტის პოზიციის დაკავების 8 განმცხადებლიდან.

საკონკურსო-საატესტაციო კომისიას დღესაც ერთი წევრი აკლდა. როგორც თემური ფეიქრიშვილი განმარტავს ეკონომიკისა და ინფრასტრუქტურის სამსახურის უფროსი გოდერძი სხირტლაძე გასაუბრებას ობიექტური მიზეზების გამო არ ესწრებოდა: „ მას სამსახურში საქმე ჰქონდა. რაც შეეხება დავით ოგანესიანს, რომელიც წინა გასაუბრებას ჯანმრთელობის მდგომარეობის გამო არ ესწრებოდა, დღეს ის გამოცხადდა“.

ხვალ, 14 მარტს, გასაუბრების მესამე ეტაპი გაიმართება. გასაუბრებას ის კონკურსანტები გაივლიან, რომელთაც განაცხადი სახანძრო-სამაშველო სამსახურის მთავარი სპეციალისტის პოზიციაზე აქვთ შეტანილი. აღნიშნულ პოსტზეა შესული ყველაზე მეტი, 25 განცხადება.

შეგასენებთ, რომ გასაუბრების პირველი ეტაპი, 11 მარტს გაიმართა. ამ დღეს გასაუბრება იმ კონკურსანტებმა გაიარეს, რომელთაც განაცხადი საკრებულოს იურისტისა და მატერიალურ ტექნიკურ უზრუნველყოფის საკითხებში მთავარ სპეციალისტის პოზიციებზე ჰქონდათ შეტანილი. აღნიშნულ პოზიციებზე 33 განაცხადი იყო შესული, გასაუბრება კი 25-მა აპლიკანტმა გაიარა.

[მანანა სარაშვილი, ადიგენი]