ახალციხეში გზების რეაბილიტაცია მიმდინარეობს

ახალციხის ცენტრალურ და შიდა გზებზე ასფალტის საფარი რამდენიმე თვეა დაზიანებულია. ტენდერში გამარჯვებულმა კომპანიამ ქალაქში გზების რეაბილიტაცია გასულ კვირას დაიწყო.

ახალციხის მუნიციპალიტეტის გამგეობაში განმარტავენ, რომ პირველ ეტაპზე გზებზე მხოლოდ დიდი ორმოები ამოივსება, შემდეგ კი პატარა ორმოებიც. სამუშაოები სავარაუდოდ კვირის ბოლომდე დასრულდება.

გზებზე საფარის აღდგენას 2014 წლის 31 იანვრის ჩათვლით, ტენდერში გამარჯვებული შპს „ოცხე“ უზრუნველყოფს. სამუშაოებისთვის 99.469 ლარია გამოყოფილი. ამავე ფირმას ევალება მუნიციპალიტეტში შემავალი საავტომობილო გზების ზამთრის პერიოდში გზების გაწმენდა და მარილის მოყრა.

"კოსტავას ქუჩაზე სამუშაოები უკვე დავასრულეთ, ამ ეტაპზე 9 აპრილის ქუჩაზე ვმუშაობთ. შემდეგ გადავალთ მეორეხარისხოვან ქუჩებზე. გამგეობის მითითებით ვაკეთებთ და სამუშაოებს ოპერატიულად ვასრულებთ", - ამბობს შპს „ოცხეს“ მთავარი ინჟინერი იური მელიქიძე.

ახალციხის მუნიციპალიტეტის გამგებლის დროებით მოვალეობის შემსრულებლის მალხაზ ჟუჟუნაძის განმარტებით, ქალაქის ქუჩებზე მიმდინარე სამუშაოებს გამგეობის ინფრასტრუქტურის განვითარებისა და ზედამხედველობის, ბუნებრივი რესურსების დაცვისა და გამწვანების სამსახურის თანამშრომლები დეტალურად ამოწმებენ.

უახლოეს მომავალში უნდა დაიწყოს ცენტრალური გზების დახაზვაც, თუმცა მანამდე ახალციხის მუნიციპალიტეტის გამგეობამ, სამუშაოების ჩასატარებლად და გამარჯვებული ფირმის გამოსავლენად, ტენდერი უნდა გამოაცხადოს.

მალხაზ ჟუჟუნაძის თქმით, ამისთვის ადგილობრივ ბიუჯეტში თანხა გათვალისწინებული აქვთ.

[თინათინ ზაზაძე, ახალციხე]