'იამკებს' ხრეშით ამოავსებენ და ჰგონიათ, რომ საქმე გაკეთდა'

ქალაქის ცენტრალურ ქუჩებზე ასფალტის საფარი ზოგან ნაწილობრივ, ზოგან კი მთლიანად დაზიანებულია. მძღოლები ამბობენ, რომ მომრავლებული ორმოების გამო მანქანებს მოძრაობა უჭირს და ხშირად ზიანდება კიდეც, მაგალითად საბურავები. გარდა ამისა, ამოტეხილი გზა ხშირად მოძრაობასაც აფერხებს და საცობებს ქმნის.

„გზები ძალიან გაფუჭდა, ზოგან იმხელა ორმოებია, რომ ან ნელა უნდა გადაიარო, რაც საცობებს იწვევს, ან საპირისპირო მხარეს წახვიდე. ასე კი ავარიული სიტუაცია იქმნება“, - ამბობს მერაბ კურტანიძე.

როგორც მძღოლები ამბობენ განსაკუთრებით ცუდი მდგომარეობაა 9 აპრილისა და კოსტავას ქუჩებზეა, ძველი ბაზრის მიმდებარე ტერიტორიაზე.

„იამკებს“ ხრეშით ამოავსებენ და ჰგონიათ, რომ საქმე გაკეთდა. ქალაქის ცენტრალურ გზა მთლიანად გასაკეთებელია“, - ამბობენ ტაქსის მძღოლები.

ახალციხის მუნიციპალიტეტის გამგეობაში ირწმუნებიან, რომ ქალაქის ცენტრალური გზები იმ დონეზე არ არის დაზიანებული, რომ ავტომობილებს გადაადგილება გაუჭირდეთ. რაც შეეხება დაზიანებულ მონაკვეთებს, შპს „ოცხე“, რომელსაც გზების მოვლა-პატრონობა ევალება, ასფალტზე გაჩენილ ორმოებს პერიოდულად ავსებს.
„ამ ეტაპზე ქალაქის ცენტრალური გზები ნორმალურ მდგომარეობაშია. რამდენიმე ადგილას არის ორმულები, რომელსაც დათბობისთანავე ამოვავსებთ“, - ამბობს ახალციხის მუნიციპალიტეტის გამგებლის მოვალეობის შემსრულებელი ბესიკ ბლიაძე.

მისივე თქმით, გზებზე მთლიანი ასფალტის საფარის შეცვლა ამ ეტაპზე არ იგეგმება.

„გზა პირველ რიგში იქ გაკეთდება, სადაც საერთოდ არ არის ასფალტი. ამის მერე ვნახოთ როგორ განვითარდება მოვლენები“,- ამბობს ბესიკ ბლიაძე.

[მანანა სარაშვილი, ახალციხე]