4 აპრილიდან წიგნები "ხეტიალს" ახალციხეშიც იწყებენ

იდეის თანახმად, იმან, ვინც წიგნს იპოვის, აუცილებლად უნდა წაიკითხოს და მერე ისევ ქალაქში, სადმე დატოვოს. აუცილებლად უნდა მიწეროს როდის და სად ტოვებს, ეს იმისთვის, რომ წიგნი არ დაიკარგოს.

მოხეტიალე წიგნები” – წამოწყება მიზნად ისახავს პოლიტიზებული ქუჩების, უბნების, ქალაქების და მთლიანად ქვეყნის კულტურულ ბლოკადას.

"მოხეტიალე წიგნები" პირველად თბილისში, 1-ელ აპრილს გამოჩნდა. იდეის ერთ–ერთი ავტორი მწერალი ჯაბა ზარქუაა, რომელსაც სურდა წიგნები რაღაც ფორმით მკითხველამდე მიეტანა. იდეა მთელმა თბილისმა აიტაცა. სამ დღეში ფეისბუქის გვერდს უკვე 32.300-მდე მოწონება აქვს და ათობით წიგნი დევს თბილისის ქუჩებში. თბილისში უკვე პირველი მპოვნელებიც გამოჩნდნენ. წიგნების გამგზავნებიც და მპოვნელებიც მათ ფოტოებს უღებენ და ყველა ეს ფოტო შემდეგ ფეისბუქის გვერდზე იყრის თავს.

მალე თბილისს სხვა ქალაქებიც აყვნენ. წიგნები უკვე "დადიან" ქუთაისში, რუსთავსა და გორში. 4 აპრილიდან აქციაში ახალციხეც ჩაერთო. ახალციხის ქუჩებში უკვე შეიძლება იპოვოთ ჯორჯ ორუელის "1984", მირზა გელოვანის "100 ლექსი", თამთა მელაშვილის "გათვლა" და დანიელ პენაკის "რომანივით საკითხავი". წიგნების მეპატრონეები გვიმხელენ, რომ საწყის ეტაპზე წიგნების დასადებად ხალხმრავალი ადგილები, ქალაქის პარკები შეარჩიეს.

ახალციხელთა ნაწილი წამოწყებას სკეპტიკურად უყურებს და ფიქრობს, რომ ქალაქში, სადაც ადგილობრივებმა პარკებში განათებები და სკამები დაამტვრიეს, წიგნებს არავინ გაუფრთხილდება და შესაბამისად, იდეა თავიდანვე განწირულია. რა ბედი ეწევა სამოგზაუროდ გაშვებულ წიგნებს, არავინ იცის, თუმცა, რამდენიმე ადამიანმაც რომ წაიკითხოს ქალაქში ნაპოვნი წიგნი, შედეგი მაინც მიღწეული იქნება.

მას ვისაც აქციაში ჩართვის სურვილი გაუჩნდება, შეუძლია ეწვიოს გვერდს ფეისბუქზე "მოხეტიალე წიგნები ახალციხეში". გვერდი გუშინ, 3 აპრილს საღამოს შეიქმნა და ამ დროისთვის 178 მოწონება აქვს.

[ნინო ნარიმანიშვილი, ახალციხე]