ახალციხეში ახალი ‘მოხეტიალე წიგნები’ გამოჩნდა

წიგნი „რა სწამს მას, ვისაც არ სწამს“ ერთმა ქალბატონმა ახალციხის ცენტრში, შოთა რუსთაველის ძეგლთან იპოვა და აბასთუმანში წაიღო. მან „სამხრეთის კარიბჭეს“ განუცხადა, რომ წაიკითხავს და ისევ უკან, ახალციხეში დააბრუნებს.

ამათ გარდა,7 აპრილიდან ახალციხეში უკვე „ხეტიალობენ“: ჯერომ სელინჯერის "კლდის პირზე, ჭვავის ყანაში", უოლტერ სკოტის „აივენჰო“, სტანისილავ ლემის „მაგელანის ღრუბელი", აკა მორჩილაძის "გადაფრენა მადათოვზე და უკან" და შტეფან ცვაიგის „უცნობი ქალის წერილი".

პირველი მოხეტიალე წიგნი ახალციხეში 4 აპრილს გამოჩნდა. ადგილობრივმა თემურ გოგოლაძემ ქალაქის ცენტრში, ამაღლების ეკლესიის ეზოში მირზა გელოვანის „100 ლექსი“ დატოვა. ამავე დღეს, „სამხრეთის კარიბჭემ“ აქციას ორგანიზებული სახე მისცა, გააკეთა გვერდი ფეისბუქზე, სახელწოდებით - „მოხეტიალე წიგნები ახალციხეში“ და ქალაქში სამი წიგნი: ჯორჯ ორუელის "1984", თამთა მელაშვილის "გათვლა" და დანიელ პენაკის "რომანივით საკითხავი" გაუშვა. "მოხეტიალე წიგნების" აქცია თბილისში, 1-ელ აპრილს დაიწყო. იდეის ავტორი მწერალი ჯაბა ზარქუაა, რომელსაც სურდა წიგნები რაღაც ფორმით მკითხველამდე მიეტანა.

აქციაში ჩართვის მსურველები „სამხრეთის კარიბჭეს“ უკვე ეხმაურებიან. 7 აპრილს დილით, აქციას არასამთავრობო ორგანიზაცია „ტოლერანტიდან“ შემოუერთდნენ. ცირა მესხიშვილმა უოლტერ სკოტის „აივენჰო“ გაუშვა სახეტიალოდ. სამი წიგნი გაათავისუფლეს სტუდენტებმა მედეა კოპაძემ და ნათია ყურმაშვილმა. მათი ერთი წიგნი, ცვაიგის „უცნობი ქალის წერილი“, მკითხველმა უკვე იპოვა.

აქციაში ჩართვა მარტივია: მსურველი იღებს სასურველ წიგნს, მასზე უკეთებს წარწერას: „გამარჯობა! მე მოხეტიალე წიგნი ვარ, ჩემმა პატრონმა სამოგზაუროდ გამომიშვა. გამიყოლე, წამიკითხე და რომ დაასრულებ, სადმე დამტოვე. არ დაგავიწყდეს, მიმაწერო ადგილი და თარიღი, სად ჩამომსვამ" და ტოვებს ქალაქში, რა ადგილზეც სურს. პარალელურად, წიგნს უღებს ფოტოს და აგზავნის ფეისბუქის გვერდზე „მოხეტიალე წიგნები ახალციხეში“, იმისთვის, რომ წიგნის შესახებ ადგილობრივებმა გაიგონ. აქციის დატვირთვაა პოლიტიზებული მოსახლეობის გადართვა ლიტერატურაზე.

ფეისბუქის გვერდი „მოხეტიალე წიგნები ახალციხეში 4 აპრილს შეიქმნა და სამ დღეში უკვე 700-ზე მეტი მოწონება აქვს.



[ნინო ნარიმანიშვილი, ახალციხე]