რის მიხედვით არჩევენ ახალ თანამშრომლებს ადიგენის თვითმმართველობაში?

ადიგენის თვითმმართველობაში მიმდინარე საჯარო მოხელეთა შესარჩევ კონკურსზე გუშინ, 11 მარტს, გასაუბრება 33 განმცხადებლიდან 25-მა გაიარა.

პირველ ეტაპზე გასაუბრება იმ კონკურსანტებმა გაიარეს, რომელთაც განაცხადი საკრებულოს იურისტისა და მატერიალურ ტექნიკურ უზრუნველყოფის საკითხებში მთავარ სპეციალისტის პოზიციებზე ჰქონდათ შეტანილი.

როგორც თვითმმართველობის მოხელეთა შესარჩევ საკონკურსო-საატესტაციო კომისიაში გვიხსნიან, 33-დან 8 აპლიკანტი გასაუბრებაზე არ გამოცხადდა.

მათივე თქმით, საკრებულოს იურისტის პოსტის დაკავება 17 აპლიკანტს სურდა, 8 პრეტენდენტი იყო მატერიალურ-ტექნიკური უზრუნველყოფის საკითხებში მთავარი სპეციალისტის ვაკანსიაზე.

შვიდკაციანი კომისიიდან ერთი წევრი, ფრაქციის „ძალა ერთობაშია“ თავმჯდომარე დავით ოგანესიანი, ჯანმრთელობის მდგომარეობის გამო გასაუბრებას არ ესწრებოდა.

საკონკურსო-საატესტაციო კომისიის წევრი გოდერძი კუბლაშვილი ამბობს, რომ განმცხადებლებს კითხვებს საჯარო სამსახურისა და ადგილობრივი თვითმართველობის შესახებ კანონებიდან უსვამდნენ. შეკითხვები იყო საქართველოს კონსტიტუციიდანაც. ინტერესდებოდნენ განმცხადებლების პროფესიული უნარ-ჩვევებითაც.

„ძალიან რთულია ასე შეაფასო პიროვნების პროფესიონალიზმი. კანონის დაზეპირება ყველას შეუძლია. ყოველთვის ვამბობდი და ახლაც ვიტყვი, რომ მათი პასუხისმგებლობის გრძნობა, განათლება თუ გამოცდილება, საქმეში უნდა გამოჩნდეს“, - ამბობს კუბლაშვილი.

საკონკურსო-საატესტაციო კომისიის თავმჯდომარის თემურ ფეიქრიშვილის თქმით, იყო კითხვები პროფესიულ უნარ-ჩვევებზე, რომლებიც კომისიის წევრებმა წინასწარ მოამზადეს: „კომისიის ყველა წევრს ჰქონდა შიდა სამუშაო ფურცელი, სადაც უნდა შეფასებულიყო აპლიკანტის კომუნიკაციისა და არგუმენტაციის უნარი, პრეზენტაბელურობა, პიროვნული ხიბლი, ჯგუფური მუშაობის უნარი, ემოციური მდგრადობა და მენეჯერული უნარი“.
კომისიის თითოეული წევრი კონკურსანტის უნარ-ჩვევებს ერთიდან ხუთ ქულამდე აფასებდა.

„აპლიკანტების საერთო მაჩვენებელში უნდა იყოს შემდეგი შეფასება: სუსტად განვითარებული, საშუალოდ განვითარებული და მაღალ დონეზე განვითარებული“, - განმარტავს თემურ ფეიქრიშვილი.

გოდერძი კუბლაშვილი ამბობს, რომ გუშინდელი გასაუბრების შედეგად კადრები უკვე შეარჩიეს, თემურ ფეიქრიშვილი კი აცხადებს, რომ ჯერ მხოლოდ ზოგადი მოსაზრებები არსებობს, საბოლოო გადაწყვეტილება მიღებული არ აქვთ.

შეგახსენებთ, რომ ადიგენის თვითმართველობაში შვიდ ვაკანტურ თანამდებობაზე კონკურსი 20 იანვარს გამოცხადდა. განცხადებების მიღება 3 თებერვალს დასრულდა. 7 ვაკანტურ ადგილზე 111 განაცხადი შევიდა, აქედან, საკონკურსო-საატესტაციო კომისიამ მეორე ეტაპზე 887 განმცხადებელი დააკმაყოფილა.

[მანანა სარაშვილი, ადიგენი]