ადიგენში საჯარო მოხელეთა შესარჩევი კონკურსის მეორე ეტაპი დაიწყო

კონკურსის მეორე ეტაპი ადიგენში დღეიდან, 11 მარტიდან დაიწყო. დღეს გასაუბრებას ის კონკურსანტები გაივლიან, რომლებმაც განაცხადი ადიგენის მუნიციპალიტეტის საკრებულოში იურისტისა და მატერიალურ-ტექნიკურ უზრუნველყოფის საკითხებში მთავარ სპეციალისტის პოზიციებზე შეიტანეს.

როგორც საკონკურსო-საატესტაციო კომისიის თავმჯდომარემ თემურ ფეიქრიშვილმა განაცხადა, აღნიშნულ პოზიციებზე 33 განაცხადია შესული.

რაც შეეხება გასაუბრების მომდევნო ეტაპს, ფეიქრიშვილის თქმით, სავარაუდოდ ხვალ ან ზეგ გაიმართება.

შეგახსენებთ, რომ ადიგენის თვითმართველობაში შვიდ ვაკანტურ თანამდებობაზე კონკურსი 20 იანვარს გამოცხადდა. განცხადებების მიღება 3 თებერვალს დასრულდა. 7 ვაკანტურ ადგილზე 111 განაცხადი შევიდა. აქედან,საკონკურსო-საატესტაციო კომისიამ მეორე ეტაპზე 87 განმცხადებელი დააკმაყოფილა. განსაკუთრებული მოთხოვნა სახანძრო-სამაშველო სამსახურის მთავარი სპეციალისტის პოზიციაზე იყო. ამ პოსტზე დასაქმების მსურველი 29 მოქალაქე აღმოჩნდა.

შვიდი ვაკანტური პოსტიდან ორი საკრებულოშია, ხუთი კი გამგეობაში.

ადიგენის მუნიციპალიტეტის საკრებულოში კონკურსი იურისტისა და მატერიალურ-ტექნიკური უზრუნველყოფის საკითხებში, მთავარ სპეციალისტის პოზიციაზე გამოცხადდა.

გამგეობაში კი კონკურსის წესით ეკონომიკისა და ინფრასტრუქტურის განვითარების სამსახურის მთავარ სპეციალისტი და სპეციალისტი სივრცით მოწყობის საკითხებში; სოფელ ლელოვანის ტერიტორიული ორგანოს რწმუნებულის თანაშემწე; სოფელ გორგულის ტერიტორიული ორგანოს რწმუნებული და სახანძრო-სამაშველო სამსახურის მთავარი სპეციალისტი უნდა შეარჩიონ.

[მანანა სარაშვილი, ახალციხე]