'ქართული ოცნება' სამცხე-ჯავახეთში პარტიის თავმჯდომარეებს ნიშნავს

პარტია „ქართული ოცნება - დემოკრატიული საქართველოს“ დამფუძნებელი კონფერენციები, ასპინძაში, ადიგენსა და ბორჯომში, გასულ კვირას ჩაატარეს. პარტიას ბორჯომში დიმიტრი ყიფიანი, ასპინძაში მამუკა მელიქიძე, ადიგენში კი ავთანდილ კაჭკაჭიშვილი უხელმძღვანელებენ.

დიმიტრი ყიფიანი ბორჯომის მუნიციპალიტეტის გამგებლის მოადგილეა, მამუკა მელიქიძე პარტიის თავმჯდომარედ დანიშვნამდეც პარტიას ხელმძღვანელობდა. ასევე პარტიის ხელმძღვანელი იყო ავთანდილ კაჭკაჭაშვილიც. იგი ამავდროულად სამცხე-ჯავახეთის გუბერნატორის მოადგილეა.

„გუშინ პოლიტსაბჭო იყო, დღეს ან ხვალ შევიკრიბებით და გადავწყვეტთ როდის ჩავატაროთ დამფუძნებელი კონფერენციები ახალქალაქში, ახალციხესა და ნინოწმინდაში“, - ამბობს პარტია „ქართული ოცნება - დემოკრატიული საქართველოს“ რეგიონული კოორდინატორი გია კარკაძე.

მისი თქმით, პარტიები ფუნქციონირებას ისევ იმ ოფისებში გააგრძელებენ, სადაც აქამდე კოალიცია „ქართული ოცნების“ ოფისები იყო: „კონფერენციებზე გადაწყდება ვინ იქნებიან პარტიის თავმჯდომარეები ახალციხეში, ახალქალაქსა და ნინოწმინდაში“.

[თამუნა უჩიძე, ახალციხე]