ახალციხის საბავშვო ბაღებში ექთნები დაბრუნდნენ

საბავშვო ბაღებში ამბობენ, რომ ექთნის არსებობა ბაღისთვის აუცილებელია.

„ყოფილა შემთხვევა, როცა ბავშვს გული წასვლია, ან კრუნჩხვებში ჩავარდნილა. ამ დროს აუცილებელია პროფესიონალი, რომელიც პირველად სამედიცინო დახმარებას გაუწევს“, - ამბობს პირველი საბავშვო ბაგის მენეჯერი თამარ ქიმერიძე.

ახალციხის სკოლამდელი აღზრდის დაწესებულებათა გაერთიანების დირექტორის ნანა გელაშვილის განმარტებით, კადრები სოფლების საბავშვო ბაღებისთვისაც შეარჩიეს. ექთნებად ის ექიმები მოიწვიეს, რომლებიც სხვადასხვა დროს ახალციხის ყოფილი რაიონული საავადმყოფოდან და პოლიკლინიკიდან შეამცირეს.

გელაშვილის თქმით, ექთნებისთვის ბაღებში უკვე გამოიყო ოთახები, თუმცა, პირველადი დახმარებისთვის საჭირო მედიკამენტები და ინსტრუმენტები ჯერ არ აქვთ: „ინვენტარს ახლო მომავალში შევიტანთ. რაც შეეხება პირველად სამედიცინო სამკურნალო საშუალებებს: სპირტს, ბამბას და შესახვევ მასალას, ამ ეტაპზე ბაღებში ჯერ არ არის“.

როგორც გელაშვილი ამბობს, მედიკამენტებით ექთნებს უახლოეს პერიოდში მოამარაგებენ.

პირველადი სამედიცინო დახმარების აღმოჩენის გარდა ექთნებს ბაღების სანიტარული და ჰიგიენური პირობების შემოწმებაც ევალებათ.

[მანანა სარაშვილი, ახალციხე]