რატომ არ ჰყავთ ლოგოპედი საბავშვო ბაღებში

ლოგოპედის შტატი მხოლოდ იმ ბაღებში ფუნქციონირებს, სადაც ხუთი ჯგუფია გახსნილი. თუმცა, ახალციხის საბავშვო ბაგა ბაღების გაერთიანების დირექტორი ნანა გელაშვილი მიიჩნევს, რომ ლოგოპედის არსებობა ყველა საბავშვო ბაღში აუცილებელია.

’ლოგოპედი ახალციხეში მხოლოდ სამ საბავშვო ბაღშია: პირველი, მეორე და ასევე პირველი ბაგა ბაღი’, - ამბობს ნანა გელაშვილი.

მისი თქმით, იმდენად მნიშვნელოვანია საბავშვო ბაღებში ლოგოპედის მუშაობა, რომ აპირებს მომავალი წლიდან აღნიშნული შტატის დაშვება ყველა ბაღში მოითხოვოს: ”არამხოლოდ ხუთჯგუფიან, არამედ ნებისმიერ მცირე საბავშვო ბაღში შეიძლება არსებობდეს ლოგოპედის საჭიროება. ვფიქრობ კარგი იქნება თუ საბავშვო ბაღებში ფსიქოლოგების შტატსაც დაუშვებენ”.

ახლციხის #2 ბაგა-ბაღში დაახლოვებით ერთი თვეა რაც ლოგოპედის შტატი ისევ დაუშვეს. ამავე საბავშვო ბაღის მენეჯერის ნათელა გელაძის თქმით, ლოგოპედის მუშაობა ყველა ბაღისთვის თანაბრად მნიშვნელოვანია.

’ჩვენს ბაღში არიან ისეთი ბავშვები, რომლებთანაც ლოგოპედი ინდივიდუალურად მუშაობს. ყველაზე მეტად ბავშვებს 3 წლის მერე სჭირდებათ ლოგოპედის დახმარება, რადგან ამ პერიოდში ლაპარაკის დროს სიტყვებს კარგად ვერ გამოთქვამენ’, - ამბობს გელაძე.

[ნუკა სტეფნაძე, ახალციხე]