ახალციხეში დენის გაორმაგებულ გადასახადებს უჩივიან

ვალეში მცხოვრებ ჯაბა ნათენაძეს ელექტროენერგიის გადასახადი დეკემბრის თვეში 65 ლარი მიუვიდა, იანვარში კი - 73. ამბობს, რომ ელექტროენეგრიას იგივე რაოდენობით მოიხმარს, როგორც გასულ თვეებში. გადასახადის ოდენობა კი 35 ლარზე მეტი არასოდეს ყოფილა.

„ვუჩივით დენის გაორმაგებულ გადასახადებს. წინა თვებთან შედარებით აშკარა მატებაა, არაფერი შეცვლილა, როგორც მოვიხმარდი წინა თვეებში, ახლაც ისევ ისე მოვიხმართ, გვაინტერესებს რა ხდება, რამ გამოიწივა ასეთი მკვეთრი ცვლა ტარიფის თუ გადასახადის, გვაინტერესებს კონკრეტული პასუხები“, - ამბობს ჯაბა ნათენაძე.

ნათენაძის მსგავსად, წინა თვეებთან შედრებით მეტ გადასახადი მიუვიდა, ახალციხეში, თაყაიშვილის ქუჩაზე მცხოვრებ ქეთევან ბარამიძესაც: „ბუნებრივი აირი გვაქვს და ელექტროენერგიას დიდი დატვირთვით არ მოვიხმართ. ყოველთვიურად გადასახადს 30 ლარის ფარგლებში ვიხდიდით, იანვრის თვეში კი 54 ლარი მოგვივიდა. ორი დღის განმავლობაში მქონდა ჩართული პლიტა, სულ რამდენიმე საათი და ამხელა განსახვავება თანხაში არ უნდა ყოფილიყო. არ ვიცი რისი ბრალია, აუცილებლად უნდა მივმართოთ ყველამ, ასე არ შეიძლება“, - ამბობს იგი.

„ენერგო-პრო ჯორჯიას“ სამხრეთ საქართველოს საზოგადოებასთან ურთიერთობის სამსახურის სპეციალისტის გიორგი ბალახაშვილის განმარტებით, ბოლო ბერიოდში ელექტროენერგიის ტარიფები არ შეცვლილა. მოსახლეობა ზამთრის პერიოდში შედარებით მეტ ელექტროენერგიას მოიხმარს, გადასახადებიც ამიტომ არის გაზრდილი.

„ნათენაძეს იანვრის თვეში მოხმარებული აქვს 418 კილოვატი, შესაბამისად, ეს გადამრავლდა მესამე საფეხურის ტარიფზე და მიუვიდა 73 ლარი და 15 თეთრი. ქეთევან ბარამიძეს მოხმარებული აქვს 322 კილოვატი და ამ აბობენტს გამოუვიდა 56.54 ლარი“, - გვიხსნის გიორგი ბალახაშვილი და აქვე ამატებს, რომ იმ შემთხვევაში, თუ აბობენტს მრიცხველის სისწორეში ეჭვი შეეპარება, შეუძლია სერვისცენტრს განცხადებით მიმართოს: „გამოიყოფა ლაბორატორია, ჩამოვლენ ფილიალიდან, რადგან სერვისცენტრს არ აქვს, დაისწრებენ აბობენტს და მის თვალწინ შემოწმდება. იმ შემთხვევაში თუ არ უნდა ადგილზე შემოწმება და მოითხოვს საქართველოს სტანდარტებისა და მეტროლოგიის სააგენტოს მიერ შემოწმებას, აბობენტის თვალწინ დალუქავენ მრიცხველს და გადასცემენ რომ წაიღოს შესამოწმებლად. ოღონდ ამ შემთხვევაში შემოწმების ხარჯები აბონენტმა თავად უნდა გაიღოს“.

„ენერგო-პრო ჯორჯიას“ სამხრეთ საქართველოს საზოგადოებასთან ურთიერთობის სამსახურში განმარტავენ, რომ დენის ტერიფები სამ საფეხურად იყოფა: პირველ საფეხურზე - 101 კილოვატის ჩათვლით აბონენტი 1კვტ-ზე 9.0034 თეთრს იხდის; მეორე საფეხურზე 101 კვტ-დან 301 კვტ-ს ჩათვლით 12.98 თეთრს; მესამე საფეხურზე 301 კვტ-ის ზემოთ კი 17.50 თეთრს.
ორგანიზაციებზე კი ტარიფი საფეხურებად არ იყოფა და რამდენი კვტ-იც არ უნდა მოიხმაროს 1 კვტ. 16.0008 თეთრია.

[თინათინ ზაზაძე, ახალციხე]