ახალციხეში დენის გაორმაგებულ გადასახადს უჩივიან

ახალციხეში რუსთაველის ქუჩაზე მცხოვრები იორ აკოფიანს, მიმდინარე თვეში ელექტროენერგიის გადასახადი 122 ლარი მიუვიდა. ამბობს, რომ 45 ლარზე მეტი გადასახადი არასდროს მოსვლია, სხვაობა ძალიან დიდია და ამიტომ გადახდას არ აპირებს. ფიქრობს, რომ შესაძლოა მიზეზი მრიცხველის გაუმართაობა იყოს, ამიტომ „ენერგო–პრო–ჯორიჯას“ რეგიონულ ოფისს უკვე მიაკითხა.

„ჩასული ვიყავი. არ გადავიხდი მე ამ თანხას, რაც უნდა ის გააკეთონ. მითხრეს, რომ ამოვალთ და ხელხლა გადავამოწმებთ მრიცხველსო. ორშაბათს ველოდები, ეს რა ამბავია!“-ამბობს იორ აკოფიანი.

აკოფიანის მსგავსად, იანვარში ელექტროენერგიის მაღალი გადასახადი მიუვიდა ახალციხეში მცხოვრებ ანასტასია ელიზბარიანსაც: „ახალი წლის პერიოდებში 15 დღე სახლი მქონდა გამოკეტილი, რაში უნდა დამეხარჯა გაორმაგებული გადასახდი რომ მოვიდა? 30 ლარს ვიხდიდი, ახლა 60 ლარია. მთელი ჩემი პენსია ამაში მიდის“.

გაორმაგებული გადსახადი მიიღო ვენერა ივანიძემაც. როგორც თავად ამბობს ამის გამო „ენერგო-პრო-ჯორჯიასაც“ მიმართა, თუმცა უშედეგოდ: „33 ლარს ვიხდი ყოველ თვეში და ახალა ქვითარი მივიღე 64 ლარია. არც არაფერს ვწვავ განსაკუთრებულს. ახალწელსაც კი არ გამომიყენებია დენი ნორმალურად, ეს რა უბედურებაა, რატომ გვატყუებენ?!“

„ენერგო–პრო ჯორჯიაში“ აცხადებენ, რომ იანვრიდან ტარიფი არ გაზრდილა. გაზრდილ გადასახადს კი ახალი წლით ხსნიან.

„ახალ წელს უფრო მეტ ელექტრო ენერგიას მოიხმარენ. ყოველ იანვარს ასეა. ამას ვერ საზღვრავენ და მისული გადასახადის ოდენობა ამიტომ უკვირთ“, – გვითხრეს „ენერგო–პრო – ჯორჯიას“ სამხრეთ საქართველოს ფილიალის საზოგადოებასთან ურთიერთობის სამსახურში.

კომპანიაში იმ აბონენტებს, ვისაც მეტი გადასახადი მიუვიდათ ურჩევნენ, რომ „ენერგო პრო ჯორჯიას“ ცხელ ხაზზე დარეკონ, ან ადგილობრივ სერვის ცენტრს მიმართონ.

[ლუბა გიორგაძე, ახალციხე]