რამდენი ლარი გაიცა საახალწლო პრემიისთვის? – ასპინძის გამგეობა ინფორმაციას არ იძლევა

„სამხრეთის კარიბჭემ“ ასპინძის მუნიციპალიტეტის გამგეობიდან საახალწლოდ გაცემული პრემიების შესახებ ინფორმაცია წერილობით 2015 წლის 25 დეკემბერს გამოითხოვა. ელექტრონული ფოსტით გაგზავნილი წერილის მიღება იმავე დღეს, ასპინძის მუნიციპალიტეტის გამგეობის ადმინისტრაციული სამსახურის უფროსმა, ანა ტივაძემ დაადასტურა.

ასპინძის მუნიციპალიტეტის გამგეობიდან პასუხი „სამხრეთის კარიბჭემ“ წერილის გაგზავნიდან მე–19 სამუშაო დღეს, 21 იანვარს, მხოლოდ მას შემდეგ მიიღო, რაც რედაქცია ტივაძეს ტელეფონით დაუკავშირდა.

მან განაცხადა, რომ ჯანმრთელობის მდგომარეობის გაუარესების გამო სამსახურში არ იმყოფებოდა: „პასუხი მე უნდა დამებრუნებინა, ჩემი ბრალია“.

ცხრა დღის დაგვიანებითა და სატელეფონო ზარების შემდეგ მიღებული ინფორმაცია კი არასრული აღმოჩნდა. გამგეობიდან მოსულ წერილში წერია: „დეკემბრის თვეში მუნიციპალიტეტის გამგეობაში დასაქმებულთა საერთო რაოდენობა შეადგენდა 63. მათგან 61 თანამშრომელზე პრემიის სახით გაცემილ იქნა ერთი თვის თანამდებობრივი სარგო“.

იმის გარკვევას, თუ რა ოდენობის პრემია გაიცა ასპინძის მუნიციპალიტეტის გამგეობის თანამშრომლებზე საახალწლოდ „სამხრეთის კარიბჭე“ ისევ ტელეფონის საშაულებით, ორი დღის განმავლობაში, ცდილობდა.

ასპინძის მუნიციპალიტეტის გამგეობის საზოგადოებასთან ურთიერთობის სამსახურის მთავარმა სპეციალისტმა თეა ბერიძემ გვითხრა, რომ ტივაძე სამსახურში არ იმყოფებოდა და ამიტომ საჯარო ინფორმაციას მის გარეშე ვერ გასცემდა. თავად ტივაძე ჯერ ინფორმაციის გარკვევას დაგვპირდა, შემდეგ ჩვენ სატელეფონო ზარზე მოკლე ტექსტური შეტყობინებით გვიპასუხა, რომ თათბირზე იყო და მოგვიანებით თავად დაგვიკავშირდებოდა. თუმცა ამის შემდეგ „სამხრეთის კარიბჭეს“ ზარებს აღარ უპასუხა.

შეგახსენებ, ახალციხის, ბორჯომის და ადიგენის მუნიციპალიტეტების გამგეობებში, ასევე ახალციხის მერიაში საახალწლოდ ჯამში პრემია 284 247 ლარი გაიცა. აქედან ახალციხის გამგეობაში – 57 540 ლარი, ბორჯომის გამგეობაში – 108 777 ლარი, ადიგენის გამგეობაში – 58 900 ლარი გაიცა, ახალციხის მერიაში 59 030 ლარი;

[თამუნა უჩიძე, ასპინძა]