რატომ შევიდა ახალციხის გამგეობაში პროკურატურა?

სამცხე-ჯავახეთის საოლქო პროკურატურის საგამოძიებო ნაწილმა ძიება სისხლის სამართლის კოდექსის 332-ე მუხლით დაიწყო, რაც სამსახურეობრივი უფლებამოსილების ბოროტად გამოყენებას გულისხმობს.

როგორც სამცხე-ჯავახეთის საოლქო პროკურატურის საგამოძიებო ნაწილის უფროსი გიორგი ბახტაძე ამბობს, გამოძიება გამგეობის რამდენიმე თანამშრომლის მიერ დანაშაულის შესაძლო ჩადენის ფაქტით დაინტერესდა.

„ძიება 24 თებერვალს დაიწყო და მოწმის სახით უკვე რამდენიმე ადამიანიც დაიკითხა“, - ამბობს ბახტაძე.

გუშინ, 4 მარტს, პროკურატურაში დაკითხვაზე დაახლოებით 8 საათი დაჰყო ახალციხის მუნიციპალიტეტის გამგბლის მოვალეობის დროებით შემსრულებელმა ბესიკ ბლიაძემ. თუმცა, იგი ამ დრომდე „სამხრეთის კარიბჭესთან“ კომენტარს არ აკეთებს.

გამოძიების ინტერესებიდან გამომდინარე, საქმესთან დაკავშირებთ, არც ახალციხის მუნიციპალიტეტის გამგეობის იურიდიული სამსახურის უფროსი ნინო დემეტრაძე საუბრობს.

პროკურატურამ, პარასკევს, 28 თებერვალს გამგეობიდან დოკუმენტები ამოიღო. პროკურატურის წარმომადგენელი ამ წუთებშიც გამგეობაში იმყოფება.

კითხვაზე, დღეს რა დოკუმენტებით დაინტერესდა პროკურატურა, დემეტრაძე გვპასუხობს: „დანიშვნების შესახებ ძველ დოკუმენტებს ვეძებ“.
როგორც „სამხრეთის კარიბჭემ“ გაარკვია, საქმე მართლაც თანამშრომლების დანიშვნის საკითხს ეხება. ჩვენი წყაროს ინფორმაციით, ის თანამშრომლები, რომლებიც სამთვიანი ვადით ჰყავდათ დანიშნული, სამი თვის ვადის გასვლის შემდეგაც მუშაობას ჩვეულებრივად აგრძელებდნენ, ღებულობდნენ ხელფასებს და პრემიებს. რამდენიმე თვის გასვლის შემდეგ მათ საჯარო მოხელეთა შესარჩევ კონკურსშიც მიიღეს მონაწილეობა.

[თამუნა უჩიძე, ახალციხე]