გამგებლის მრჩევლის დაპირებული პასუხი ”სამხრეთის კარიბჭეს”

ახალციხის მუნიციპალიტეტის გამგებლის მრჩეველი გოჩა პარუნაშვილი აცხადებს, რომ გაერთიანებული წყალმომარაგების კომპანიის სამცხე-ჯავახეთის ფილიალი ხელშეკრულებით ნაკისრ ვალდებულებას, სარემონტო სამუშაობის შემდეგ გზა გადათხრილი არ დატოვოს, არ ასრულებს.

პარუნაშვილის განმარტებით, კომპანიის წარმომადგენლების მიერ გამგეობაში შეტანილ წერილზე პასუხის გაცემაც ამ მიზეზით შეფერხდა. წყალმომარაგების კომპანია წყლის დაზიანებული მილის გამო გამგეობიდან გზის გადათხრის ნებართვას ითხოვდა, ამ დროისთვის კი მუნიციპალიტეტის გამგეობასთან ნაკისრი ვალდებულებები შესრულებული არ ჰქონდა.

”თითქმის მთელი ქალაქი გადათხრილი იყო, სისტემატურად ითხოვენ ნებართვას გზის გადათხრაზე, შემდეგ თხრიან და ტოვებენ. ამიტომ ვუთხარით, რომ ჯერ გადათხრილი ქუჩები მოეწესრიგებინათ და 9 აპრილის ქუჩაზე გადათხრის ნებართვას ამის შემდეგ მივცემდით”, - ამბობს პარუნაშვილი.

მისი თქმით, ქალაქში დაზიანებული წყლის გამო გზა გადათხრილი 8 ადგილზე იყო: ”ეს ქალაქის იერსახეს აზიანებს, ასევე ქმნის საავარიო სიტუაციებს”.

პარუნაშვილის განცხადებით, მას შემდეგ რაც წყალმომარაგების კომპანიამ დაზიანებული ქუჩები შეაკეთა, 9 აპრილზე ქუჩის გადათხრის ნებართვაც მიიღო.

ახალციხის მუნიციპალიტეტის გამგეობის ეკონომიკისა და ინფრასტრქუტურის სამსახურის წარმომადგენლის გია ქასრაშვილის განცხადებით, წერილზე პასუხის გაცემა იმიტომ დაგვიანდა, რომ წყალმომარაგების კომპანიამ 9 აპრილის ქუჩაზე ასფალტის საფარის აყრის შემდეგ მის კვლავ დაგებაზე უარი განაცხადა: ”მოგვიანებით სათაო ოფისთან შეთანხმდნენ, ნებართვა აიღეს, რომ დაზიანებულ გზას შეაკეთებენ და ამის შემდეგ პასუხის გაცემა არც ჩვენგან დაგვიანებულა”.

შეგახსენებთ, რომ გასული კვირის ორშაბათს ტრადიციულ თათბირზე გამგეობაში უპასუხოდ დარჩენილი წერილების შესახებ იმსჯელეს. განსაკუთრებული ყურადღება კი წყალმომარაგების კომპანიის წერილზე გაამახვილეს. როგორც გასულ კვირას პარუნაშვილმა განაცხადა, მან აღნიშნულის შესახებ ”სამხრეთის კარიბჭისგან” შეიტყო. სწორედ ამიტომ დადო მან პირობა გაზეთთან, რომ ერთ კვირაში აღნიშნულ ამბავს გაარკვევდა და დამნაშავეს სათანადოდაც დასჯიდა.

[თამუნა უჩიძე, ახალციხე]