სამწლიანი ლოდინის შემდეგ, 78 წლის მაჰმუდ გოვჰაროვი ოჯახთან დაბრუნდა

78 წლის მაჰმუდ გოვჰაროვი ოჯახთან ერთად საქართველოში 2009 წელს დაბრუნდა. 2011 წლის 29 თებერვალს აზერბაიჯანში სამკურნალოდ წავიდა, საქართველოში იმავე წლის 17 მარტს უნდა დაბრუნებულიყო, თუმცა საზღვრის გადმოკვეთის უფლება აღარ მისცეს. გოვჰაროვმა საქართველოში დაბრუნება ამის შემდეგაც რამდენჯერმე სცადა, თუმცა, უშედეგოდ.

სამცხე-ჯავახეთის რეგიონული ასოციაცია „ტოლერანტის“ ხელმძღვანელის ცირა მესხიშვილის თქმით, მაჰმუდ გოვჰაროვის საქართველოში დაბრუნების შესახებ საქართველოს შინაგან საქმეთა სამინისტროსა და საქართველოს სახალხო დამცველის აპარატს ოფიციალურად მიწერეს.

2012 წლის 14 დეკემბერს საქართველოს შინაგან საქმეთა სამინისტროსგან მიღებულ წერილში ნათქვამია, რომ „უცხოელთა სამართლებრივი მდგომარეობის შესახებ საქართველოს კანონის 14-ე მუხლის პირველი პუნქტის „ე“ ქვეპუნქტის (საქართველოში მისი ყოფნა საფრთხეს შუქმნის საზოგადოებრივ წესრიგს და უშიშროებას, საქართველოს მოქალაქეებისა და საქართველოში მცხოვრებ პირთა ჯანმრთელობას, უფლებებისა და კანონიერი ინტერესების დაცვას) თანახმად მაჰმუდ გოვჰაროვს საქართველოს ტერიტორიაზე შემოსვლა აკრძალული აქვს.

„გამოხმაურებები იყო ძალიან არაადექვატური, რომ ეს კაცი ყალბი დოლარების საქმეებში იყო დასახელებული. ეს რა თქმა უნდა სიმართლეს არ შეესაბამებოდა და საბოლოოდ არც დამტკიცდა“, - ამბობს ცირა მესხიშვილი და ამატებს, რომ საბოლოოდ სახელმწიფომ მისი დაბრუნების გადაწყვეტილება მიიღო.

[თამარ თოთაძე, ახალციხე]