სომეხ მეცნიერს საქართველოში შემოსვლასა და დარჩენაზე უარი ეთქვა

სომხეთის მეცნიერებათა ეროვნული აკადემიის ისტორიის ინსტიტუტის დირექტორი აშოტ მელქონიანი, სასაზღვრო-გამშვები პუნქტის „კარწახის“ გავლით, თურქეთიდან საქართველოში შემოდიოდა. საზღვარზე მას საქართველოში შემოსვლა და დარჩენა აეკრძალა.

"არანაირი პოლიტიკური განცხადება არ გამიკეთებია. პირიქით, მე ვამტკიცებდი და ახლაც დარწმუნებული ვარ, რომ ჩვენს ორ ქრისტიანულ ქვეყანას შორის, ძმური ურთიერთობის გარეშე არსებობა შეუძლებელია", - განაცხადა აშოტ მელქონიანმა საინფორმაციო სააგენტო jnews.ge-სთან.

საქმეში სომხეთის საელჩო ჩაერთო, რომელმაც ითხოვა მელქონიანი, ტრანზიტული მგზავრის სტატუსით, საქართველოს გავლით თურქეთიდან სომხეთში გაეტარებინათ. საელჩოს თხოვნის შესაბამისად, ინსტიტუტის დირექტორი სომხეთში გაემგზავრა.

შინაგან საქმეთა სამინისტროს ინფორმაციით, მელქონიანს უარი ეთქვა საქართველოს კანონის – “უცხოელთა და მოქალაქეობის არმქონე პირთა სამართლებრივი მდგომარეობის შესახებ” – მე-11 მუხლის “თ” ქვეპუნქტის საფუძველზე“.

კანონონის ეს ქვეპუნქტი ითვალისწინებს, უცხოელს ქვეყანაში შემოსვლაზე უარი ეთქვას, თუ იგი არ იძლევა ინფორმაციას ან იძლევა ყალბ ინფორმაციას თავისი პიროვნებისა და მგზავრობის მიზნის შესახებ.

აშოტ მელქონიანი სომხეთის მეცნიერებათა ეროვნული აკადემიის ისტორიის ინსტიტუტის დირექტორია. იგი ახალქალაქში დაიბადა, სწავლობდა ახალქალაქის N4 სკოლაში, შემდეგ კი განათლების მისაღებად ერევანში გაემგზავრა. მელქონიანს ეკუთვნის სამეცნიერო ნაშრომები სომხურ-ქართული ისტორიული ურთიერთობების შესახებ.

[თაკო ფეიქრიშვილი, ახალქალაქი]