სამცხე-ჯავახეთის სამხარეო ადმინისტრაციაში თანამშრომლების ატესტაცია დასრულდა

მთავარი → პოლიტიკა 28.01.2014

სამცხე-ჯავახეთის გუბერნიის თანამშრომლების ატესტაცია დასრულდა, თუმცა, რომელმა საჯარო მოხელემ გაიარა წარმატებით ატესტაცია და ვის მოუწევს თანამდებობის დატოვება ჯერჯერობით უცნობია.

სამცხე-ჯავახეთის სამხარეო ადმინისტრაციაში თანამშრომლების ატესტაცია დასრულდა

ატესტაცია ადმინისტრაციაში დასაქმებულმა 26-ვე შტატიანმა თანამშრომელმა გაიარა. ამჟამად საკონკურსო-საატესტაციო კომისია მათ პირად საქმეებსა და ატესტაციის შედეგებზე მსჯელობს.

სამხარეო ადმინისტრაციაში საზოგადოებასთან ურიერთობის სპეციალისტის ია გოგატიშვილის განმარტებით, პროცესი მშვიდ ვითარებაში მიმდინარეობდა.

„სამსახურეობრივ ფუნქციებთან დაკავშირებით იყო შეკითხვები. აგრეთვე დამატებითი საკვალიფიკაციო მოთხოვნების შესაბამისად, რა ნორმატიული აქტების ცოდნა მოეთხოვება ამა თუ იმ სამსახურში დასაქმებულ მოხელეს“,-ამბობს ია გოგატიშვილი.

შეგახსენებთ, რომ სამცხე-ჯავახეთის სამხარეო ადმინისტრაციაში თანამშრომლების ატესტაცია ორი დღის განმავლობაში გაგრძელდება. გასაუბრებას მხოლოდ შტატიანი თანამშრომლები გადიან. 46 თანამშრომლიდან გუბერნიაში მუდმივ შტატზე 26 თანამშრომელი მუშაობს. ატესტაცია იმ რეორგანიზაციის ნაწილია, რომელიც გუბერნიაში ორი თვის წინ დაიწყო.

[თინათინ ზაზაძე, ახალციხე]