სამცხე-ჯავახეთის გუბერნიიდან 16 თანამშრომელი გაათავისუფლეს

ამ 16 თანამშრომლიდან, 8-მ ატესტაცია ვერ გაიარა, 8-ს კი სამსახური რეორგანიზაციის გამო დაატოვებინეს. შეგახსენებთ, რეორგანიზაციის შედეგად, სამხარეო ადმინისტრაციაში არსებული შვიდი სამსახურიდან ოთხი დარჩა.

რაც შეეხება ატესტაციას, კომისიის წინაშე გუბერნიის 46 თანამშრომლიდან მხოლოდ 26, მუდმივ შტატზე მომუშავე თანამშრომელი წარსდგა, ამ 26-დან კი სამსახური 8-მ დატოვა, მათ, ვინც ატესტაციაში ნაწილობრივ დამაკმაყოფილებელი ან არადამაკმაყოფილებელი შეფასება მიიღო.

საჯარო მოხელეთა მუდმივმოქმედმა საკონკურსო-საატესტაციო კომისიამ შედეგები დღეს, 3 თებერვალს გაასაჯაროვა. გათავისუფლებული თანამშრომლები დაკავებულ თანამდებობებს ოფიციალურად 17 თებერვალს დატოვებენ.

დღევანდელი მონაცემებით, გუბერნიაში მომუშავე 46 მოხელიდან, მუდმივ შტატზე მხოლოდ 18 თანამშრომელი მუშაობს, 8 პოსტი ვაკანტურია, დანარჩენ ადგილებზე მოვალეობის შემსრულებლები მუშაობენ.

მოვალეობის შემსრულებლებისა და ვაკანტური ადგილების შესავსებად გუბერნიას ახალი კონკურსი აქვს ჩასატარებელი, რომლისთვისაც 3-თვიანი ვადა აქვს. როდის ჩატარდება კონკურსი, ამ ეტაპზე ცნობილი არ არის.

სახელმწიფო რწმუნებულის აკაკი მაჭუტაძის განმარტებით, რომელიც კომისიის თავმჯდომარეცაა, კონკურსი ერთ თვეში, ან თვენახევარში ჩატარდება.

შეგახსენებთ, რომ სამხარეო ადმინისტრაციაში რეორგანიზაცია 29 ნოემბერს დაიწყო. რეორგანიზაციის ნაწილი იყო ატესტაცია, რომელიც 28 იანვარს ჩატარდა.

[თინათინ ზაზაძე, ახალციხე]