გუბერნიის თანამშრომლების ბედი 3 თებერვალს გადაწყდება

საჯარო მოხელეთა მუდმივმოქმედი საკონკურსო-საატესტაციო კომისიის თავმჯდომარის, სამცხე-ჯავახეთის გუბერნატორის აკაკი მაჭუტაძის განმარტებით, იმ შემთხვევაში თუ ატესტაციის შედეგებს მოხელეები საპრეტენზიო კომისიაში არ გაასაჩივრებენ, კომისია ორშაბათს უკვე შეძლებს საბოლოო გადაწყვეტილება მიიღოს.

30 იანვრის დღის 14:00 საათის მონაცემებით, საპრეტენზიო კომისიისთვის ჯერ არავის მიუმართავს. ატესტაციის შედეგების გასაჩივრება გუბერნიის თანამშრომლებს 31 იანვრის 19:00 საათამდე შეუძლიათ.

შეგახსენებთ, სამცხე-ჯავახეთის სამხარეო ადმინისტრაციაში საჯარო მოხელეთა ატესტაცია 28 იანვარს ჩატარდა. 46 თანამშრომლიდან ატესტაცია შტატში მყოფ 26 თანამშრომელს შეეხო.

შეესაბამებით, ნაწილობრივ შეესაბამებით ან არ შეესაბამებით, - ასეთი ფორმულირებით გააცნო პასუხები ატესტაციის მეორე დღეს, 29 იანვარს, კომისიამ ატესტაციაგავლილ მოხელეებს. თუმცა, ვინ რა შეფასება მიიღო, ამ დრომდე არ ასაჯაროებენ.

გუბერნიაში ჩატარებული ატესტაცია იმ რეორგანიზაციის ნაწილია, რომელიც სამხარეო ადმინისტრაციაში 29 ნოემბერს დაიწყო.

[sknews.ge]