მესხ მოსწავლეებს დროებითი ბინადრობის უფლება მიენიჭებათ

საქართველოს განათლებისა და მეცნიერების მინისტრის 2012 წლის 6 იანვრის ბრძანების, ”ზოგადსაგანმანათლებლო დაწესებულებაში მოსწავლის ჩარიცხვისა და მოსწავლის სტატუსის შეჩერების წესის შესახებ” მე-4 მუხლის თანახმად, უცხო ქვეყნის მოქალაქე ან მოქალაქეობის არმქონე პირს, ვინც სტანდარტული ვაუჩერის შესაბამის თანხას არ შეიტანდა საქართველოს სახელმწიფო ბიუჯეტის შემოსულობების შესაბამის სახაზინო ანგარიშზე მოსწავლის სტატუსი უჩერდებოდა.

საქართველოს მასშტაბით ასეთი 23 რეპატრირებული მესხი მოსწავლე იყო. ბევრი მათგანი სკოლაში დადიოდა, თუმცა, ოფიციალურად ისინი არსად ფიქსირდებოდნენ და შესაბამისად, ვერც საბაზო ან საშუალო საფეხურის დამთავრების დამადასტურებელ დოკუმენტს იღებდნენ. ამის გამო, რამდენიმე მათგანმა, სკოლის დამთავრების შემდეგ, ვერც სწავლის გაგრძელება შეძლო.

ასოციაცია „ტოლერანტი“, რომელიც რეპატრირებული მესხების საკითხზე წლებია მუშაობს, პრობლემის მოგვარებას 2011 წლიდან ცდილობდა. ორგანიზაციაში ამბობენ, რომ განათლების, დევნილთა და იუსტიციის სამინისტროებს არაერთი წერილი მისწერეს. ორგანიზაცია პრობლემის მოგვარებაში ჩართვას სთხოვდა საქართველოს სახალხო დამცველის აპარატის ბავშვთა უფლებების ცენტრსაც.

„დაახლოებით 150-მდე წერილი გვაქვს გაგზავნილი სხვადასხვა სამინისტროში. ვითხოვდით, რომ ბოლოს და ბოლოს ამ ბავშებს სკოლაში უფასოდ სწავლის უფლება ჰქონოდათ. წლების განმავლობაში ირღვეოდა მათი უფლებები, რამდენიმე ახალგაზრდას ატესტატიც არ აქვს მიღებული. ჯერ არ გვქონია პრეცედენტი, რომ მათ უმაღლესში ჩაებარებინოთ“, - ამბობს ასოციაცია „ტოლერანტის“ ხელმძღვანელი ცირა მესხიშვილი.

მისივე თქმით, ასოციაციის სამწლიანმა მუშაობამ შედეგი გამოიღო და მოქალაქეობის არმქონე ბავშვებს დროებითი ბინადრობის უფლება მიენიჭებათ. ეს მათ საშუალებას მისცემს სკოლაში უფასოდ ისწავლონ და ატესტატი მიიღონ.

რეპატრირებული მესხი მოსწავლეები დროებითი ბინადრობის უფლებას მას შემდეგ მიიღებენ, რაც საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროში მათი მონაცემები გაიგზავნება.

„ბინადრობის უფლების მინიჭება დიდ სირთულეს არ წარმოადგენს, საბუთების მოგროვება უფრო რთულია. იმის გამო, რომ მათი დიდი ნაწილი დაუსაქმებელია, სამუშაოდ თურქეთში არიან წასული, მშობლების საბუთების მოგროვება ცოტა ჭიანურდება“, - გვიხსნის ცირა მესხიშვილი.

თუმცა, მისივე თქმით, მთავარია, რომ პრობლემა გვარდება.
„ამ პრობლემის მოსაგვარებლად სახელმწიფო წინა წლებში უფრო ნელა დგამდა ნაბიჯებს, მაგრამ დღევანდელმა ხელისუფლებამ ინტერესი გამოხატა რეპატრირებული მესხების მიმართ“, - დასძენს ცირა მესხიშვილი.

[თამარ თოთაძე, ახალციხე]