,,მოჯადოებული წრე“

გიორგი მანზულოვს, რომელიც ახალციხის მუნიციპალიტეტის სოფელ კლდეში ცხოვრობს და ამავე სოფლის სკოლაში მეშვიდე კლასის მოსწავლეა, გამოცდა ორ საგანში უნდა ჩაებარებინა, მაგრამ რადგან პირადი ნომერი არ აქვს გამოცდებზე არ დაუშვეს.

- "ბავშვს ფაქტია სწავლა აუკრძალეს“ , - ამბობს სამცხე-ჯავახეთის რეგიონული ასოციაცია ,,ტოლერანტის“ მენეჯერი გოჩა ნათენაძე.

- "არანაირი მოძრაობა ამ ბავშვების სასიკეთოდ არ შეინიშნება. კიდევ ერთხელ შევეხმიანეთ ახალციხის საგანმანათლებლო რესურს ცენტრს და მივიღეთ ტრაფარეტული პასუხი - რეპატრირებული მესხები თუ მიღებენ მოქალაქეობას, პარალელურად მიიღებენ პირად ნომერს და შემდეგ ექსტერნად შეძლებენ გამოცდების ჩააბარებას. ანუ მივედით იმ საწყის მდგომარეობამდე, რომელიც თავდაპირველად გვქონდა, მოჯადოებული წრე გამოდის“, - გვითხრა ასოციაცია ,,ტოლერანტის“ ხემძღვანელმა ცირა მესხიშვილმა.

დაამთავრებს თუ არა სკოლას, ან საერთოდაც შეძლებს კლასიდან კლასში გადასვლას საქართველოში მცხოვრები 19 რეპატრირებული მესხი ბავშვი სასწავლო წლის ბოლოსაც გაურკვეველი რჩება.

მდგომარეობის გასარკვევად განათლებისა და მეცნიერების სამინისტროს პრეს-ცენტრის უფროსს ნინო პოტრჟებსკაის დაუკავშირდით.
"მოგვმართეთ წერილობით და კითხვებით“, - ასე გვიპასუხა მან სატელეფონო საუბარში.

ამ საკითხთან დაკავშირებით ამა წლის 23 იანვარს სამცხე-ჯავახეთის რეგიონულმა ასოციაცია "ტოლერანტმა საქართველოს განათლებისა და მეცნიერების მინისტრს დიმიტრი შაშკინის სახელზე წერილი გაგზავნა, სადაც დეტალურად იყო აღწერილი აღნიშნული პრობლემა.
შეგახსენებთ, რომ საქართველოს განათლებისა და მეცნიერების მინისტრის 2012 წლის 6 იანვრის ბრძანებაში, ,,ზოგადსაგანმანათლებლო დაწესებულებაში მოსწავლის ჩარიცხვისა და მოსწავლის სტატუსის შეჩერების წესის შესახებ” მუხლი 4. მოსწავლის სტატუსის შეჩერება ვკითხულობთ:

1.სკოლა უფლებამოსილია დაწყებით და საბაზო საფეხურის მოსწავლეს შეუჩეროს მოსწავლის სტატუსი იმ შემთხვევაში, თუ:

გ) უცხო ქვეყნის მოქალაქე ან მოქალაქეობის არმქონე პირი (გარდა საქართველოში მუდმივად მცხოვრები მოქალაქეობის არმქონე პირისა) სტანდარტული ვაუჩერის შესაბამის თანხას არ შეიტანს საქართველოს სახელმწიფო ბიუჯეტის შემოსულობების შესაბამის სახაზინო ანგარიშზე;
რეპატრირებული მესხებს მძიმე სოციალური პრობლემები აქვთ და არ შეუძლიათ ვაუჩერის თანხის დაფარვა.

ამავდროულად, საქართველოში განათლება უზრუნველყოფილია საქართველოს კონსტიტუციის 35-ე მუხლის მესამე ნაწილის მიხედვით.

[გულო კოხოძე, ახალციხე]