დღეს პირველკლასელთა ელექტრონული რეგისტრაცია სრულდება

საქართველოს განათლებისა და მეცნიერების სამინისტროს ინფორმაციით, დღეს პირველკლასელთა საყოველთაო ელექტრონული რეგისტრაცია სრულდება. 11 ივნისიდან 21 ივნისის ჩათვლით კი მშობლებმა ზოგადსაგანმანათლებლო დაწესებულებაში მოსწავლის პირველ კლასში ჩასარიცხად აუცილებელი დოკუმენტები უნდა წარადგინონ.

ჩასარიცხად წარსადგენი აუცილებელი დოკუმენტების ნუსხა ასეთია:
1. მოსწავლის კანონიერი წარმომადგენლის განცხადება, რომელიც უნდა შეიცავდეს კანონიერი წარმომადგენლის საცხოვრებელი ადგილისა და ტელეფონის ნომრის თაობაზე ინფორმაციას;

2. დაბადების მოწმობის ან პირადობის დამადასტურებელი დოკუმენტის სანოტარო წესით დამოწმებული ასლი, რომელიც მოსწავლის ამ ზოგადსაგანმანათლებლო დაწესებულებაში სწავლის პერიოდში ინახება დაწესებულებაში;

3. საჯარო სამართლის იურიდიული პირის - სახელმწიფო სერვისების განვითარების სააგენტოს ან მისი ტერიტორიული სამსახურის მიერ გაცემული დოკუმენტი, რომლითაც დასტურდება საქართველოს მოქალაქეობის, საქართველოში ბინადრობის ნებართვის ან ბინადრობის მოწმობის მქონე მოსწავლისათვის პირადი ნომრის მინიჭება.

სამინისტროს ინფორმაციით, გარდა აღნიშნული საბუთებისა სკოლას უფლება აქვს მოითხოვოს დამატებით დოკუმენტაციის წარდგენა.

შეგახსენებთ, რომ პირველკლასელთა ელექტრონული რეგისტრაცია მიმდინარე წლის 15 მაისს დაიწყო.

[sknews.ge]