ცესკომ ახალქალაქში არჩევნებზე იმსჯელა

ახალქალაქში საქართველოს ცენტრალურ საარჩევნო კომისიასთან არსებული ეთნიკური უმცირესობების საკითხების სამუშაო ჯგუფის დაახლოებით 15 წევრი ჩამოვიდა, რათა შეხვედრის მონაწილეებისთვის თავიანთი სამომავლო გეგმები წარედგინათ, ესაუბრათ საარჩევნო პროცესში შეტანილ სიახლეებზე, რომლებიც ძირითადად ეროვნულ უმცირესობებს ეხება და ასევე შეკრებილთა კითხვებისა და წინადადებებისთვის მოესმინათ.

სამუშაო ჯგუფში 19 არასამთავრობო, საერთაშორისო და უფლებების დამცველი ორგანიზაცია და მედიის 2 წარმომადგენელია გაერთიანებული. კერძოდ: საქართველოს სახალხო დამცველის ოფისი, საარჩევნო სისტემების საერთაშორისო ფონდი (IFEშ), გაერო-ს განვითარების პროგრამა, საქართველოს გაერო-ს ასოციაცია, აზერბაიჯანელ ქალთა კავშირი, “დემოკრატ მესხთა კავშირი”, “მრავალეროვნული საქართველო”, ახალციხის ახალგაზრდული ცენტრი, საზოგადოებრივი მაუწყებელი, რადიო “იმედი” და ასე შემდეგ.

სამუშაო ჯგუფის ფუნქციებში 2012-2013 წლების სამოქმედო გეგმის შემუშავება, თბილისსა და რეგიონებში შეხვედრების ორგანიზება, სამოქმედო გეგმის მონიტორინგი და დაგეგმილი და განხორციელებული პროექტების მონიტორინგი შედის.

სამუშაო ჯგუფი ეროვნული უმცირესობებისთვის ხმის მიცემის პროცესის გამარტივებაზე იმუშავებს. ასევე მიმდინარეობს ხმის მიცემის პროცესის გამარტივება შეზღუდული შესაძლებლობების მქონე პირთათვის. სამუშაო ჯგუფის მიზნობრივ აუდიტორიაში შედიან ქალები, ახალგაზრდობა, შეზღუდული შესაძლებლობების მქონე პირები და მედია.

ეთნიკური უმცირესობების საკითხების სამუშაო ჯგუფის თავმჯდომარემ სოფიკო სიჭინავამ ხაზი გაუსვა მედიის განსაკუთრებულ როლს, რომლის გარეშეც, მისი თქმით, არჩევნებზე მოსახლეობის ინფორმირება ძალიან რთული იქნებოდა.

სოფიკო სიჭინავა ამბობს, რომ სამუშაო ჯგუფის ინფორმირება და მუშაობა მოსახლეობასთან სემინარებისა და ხალხთან, არასამთავრობო ორგანიზაციებთან შეხვედრების საშუალებით, ბუკლეტებისა და ფლაერების გავრცელებით წარიმართება. ცენტრალური საარჩევნო კომისია ადგილობრივი არასამთავრობო ორგანიზაციებისთვის გრანტების გამოყოფასაც გეგმავს.

[ქრისტინა მარაბიანი, ახალქალაქი]