ეროვნული უმცირესობები და მედია

საქართველოს სახალხო დამცველის ახალქალაქის ოფისში ჩატარდა მრგვალი მაგიდა შემდეგი ორგანიზაციების ხელშეწყობით: USAID, UNAG, ANI, ECMI, UNDP. მრგვალი მაგიდა მიეძღვნა თემას: “ქვეყანაში მიმდინარე მოვლენების შესახებ სამცხე-ჯავახეთში მცხოვრები ეროვნული უმცირესობებისთვის ინფორმაციის მიწოდების სისტემა და ქართულ მედიაში ეროვნული უმცირესობების საკითხების გაშუქება”.

შეხვედრა-დისკუსიაზე ცენტრალური და რეგიონული მედიის, არასამთავრობო და უფლებების დამცველი ორგანიზაციების წარმომადგენლები იყვნენ მიწვეული.

სამცხე-ჯავახეთის მედიის წარმომადგენლებმა საქმიანობისა და პრობლემების შესახებ ისუბრეს. მათი თქმით, ძირითადი პრობლემა დაფინანსება, ტექნიკურ აღჭურვილობა და ადგილობრივი მოსახლეობის დამოკიდებულებაა.

შეხვედრაზე სამცხე-ჯავახეთში ცენტრალური მედიის პოპულარობის თემაზე მცირე მონიტორინგი ჩატარდა. საქართველოს პირველი არხი დაინტერესებული იყო, რამდენად პოპულარულია სომხურენოვან რაიონებში მათ მიერ სომხურ ენაზე თარგმნილი საინფორმაციო გადაცემა “მოამბე”.

დისკუსიის თემები იყო ადგილობრივი მოსახლეობის ინტერესი ცენტრალური მედიის მიმართ და ზოგიერთი ცენტრალური ბეჭდური მედიის არატოლერანტულობა ეროვნული უმცირესობების მიმართ.

ომბუცმენის ოფისში არსებული ტოლერანტობის ცენტრის ხელმძღვანელის ბექა მინდიაშვილის თქმით, საქართველოში მოქმედი ზოგიერთი კონფესიისთვის იურიდიული პირის სტატუსის მინიჭების შესახებ კანონის მიღება მედიის ზოგიერთ საშუალებაში სიძულვილის ენის გამოყენების საფუძვლად იქცა.

მრგვალი მაგიდის მიწურულს ეროვნული უმცირესობების ინფორმირების პროცესის გაუმჯობესების რეკომენდაციები დაფიქსირდა და შედეგად ყველანი მივიდნენ დასკვნამდე, რომ სასურველი ეფექტის მისაღწევად აუცილებელია ცენტრალური და ადგილობრივი მედიის თანამშრომლობა.

[ქრისტინა მარაბიანი, ახალქალაქი]