ცესკო ახალციხეში სტუდენტებს შეხვდა

შეხვედრა სამცხე-ჯავახეთის სახელმწიფო სასწავლო უნივერსიტეტის ბიბლიოთეკაში გაიმართა. შეხვედრას ძირითადად პირველკურსელი სტუდენტები ესწრებოდნენ, რომლებიც არჩევნებში წელს პირველად მონაწილეობენ.

„სტუდენტებს ვაწვდით ინფორმაციას იმის შესახებ, თუ რას აპირებს ცენტრალური საარჩევნო კომისია 2013 წლის საპრეზიდენტო არჩევნებისთვის. რაც მთავარია, გავაცანით საარჩევნო პროცედურები“,- ამბობს ცენტრალური საარჩევნო კომისიის კოორდინაციისა და მართვის დეპარტამენტის უფროსი და ეროვნული უმცირესობების სამუშაო ჯგუფის ხელმძღვანელი სოფო სიჭინავა.

ცენტრალური საარჩევნო კომისიის წევრებმა სტუდენტებს ცეესკოს მიერ მომზადებული ვიდეორგოლი აჩვენეს, რომელიც საარჩევნო პროცედურებს ასახავდა. ასევე, ცესკო-ს მაისურები, კალამი და საარჩევნო პროცედურების შესახებ ფლაერები დაურიგეს.

2013 წლის საპრეზიდენტო არჩევნებისთვის, პირველად, ცენტრალური საარჩევნო კომისია უსინათლო ამომრჩევლებისთვის ბიულეტინების ჩასადებ ჩარჩო ფორმას დაბეჭდავს. გარდა ამისა, სიჭინავას თქმით, საპრეზიდენტო არჩევნებისთვის მაქსიმალურად იქნება გათვალისწინებული შეზღუდული შესაძლებლობების მქონე პირების ინტერესები: "ეს გულისხმობს საარჩევნო უბნების ადაპტირებას და შეზღუდული შესაძლებლობების მქონე ამომრჩევლების ინფორმირებას“.

კიდევ ერთი სიახლე, ეროვნულ უმცირესობებს ეხებათ. სოფო სიჭინავას თქმით, ცენტრალური საარჩევნო კომისიამ უზრუნველყო საარჩევნო დოკუმენტაცის თარგმნა.

დღევანდელი დღით ცეესკომ რეგიონებში სტუდენტებთან შეხვედრები დაასრულა.

[მანანა სარაშვილი, ახალციხე]