ექსპერიმენტი მესხეთის თეატრში

პროექტის პრეზენტაცია, რომლის იდეა საქართველოს რეგიონებში თეატრალური ცხოვრების გამოცოცხლება, რეპერტუარის გაზრდა-განახლება და თეატრის სფეროში ერთცენტრიანობის დამთავრებაა, დღეს საქართველოს კულტურისა და ძეგლთა დაცვის სამინისტროში გაიმართა. პროექტის ავტორი კულტურისა და ძეგლთა დაცვის მინისტრის მოადგილე მაკო ჭოღოშვილია.

პროექტის თანახმად, 5 დიპლომანტი რეჟისორი: დავით ჩხარტიშვილი, ირაკლი ძნელაძე, თამარ პოპიაშვილი, ჯაბა პაპუაშვილი და მიხეილ ჩარკვიანი, საქართველოს ხუთ ქალაქში: ქუთაისში, ახალციხეში, თელავში, ჭიათურასა და ბათუმში ახალ სპექტაკლს დადგამს.
სპექტაკლების დასადგმელად თანხებს საქართველოს კულტურისა და ძეგლთა დაცვის სამინისტრო გამოყოფობს. თითოეულ თეატრს 8 000 ლარი გამოეყოფა.

- "ეს პროექტი არის სერიოზული ნაბიჯი იმისკენ რომ ერთცენტრიანობა თეატრის სფეროშიც დამთავრდეს, ეს კომუნისტური გადმონაშთია და დროა თბილისის გარდა კულტურული ცხოვრება საქართველოს რეგიონებშიც გამოვაცოცხლოთ. თეატრს ჩვენი მხარდაჭერა დღეს განსაკუთრებით სჭირდება რადგან სერიოზული კონკურენტები ჰყავს ტელევიზიისა და ინტერნეტის სახით”, - განაცხადა საქართველოს კულტურისა და ძეგლთა დაცვის მინისტრმა ნიკოლოზ რურუამ.
მისივე თქმით, ეს ექსპერიმენტი ტრადიციად იქცევა და მომავალში ყველა კურსდამთავრებული თავის სადიპლომო სამუშაოს რეგიონებში ჩაატარებს: ”ხუთივე პრემიერას მე პირადად დავესწრები”.
დიპლომანტ რეჯისორებს დახმარებას თეატრების მმართველები გაუწევენ.

მესხეთის სახელმწიფო დრამატული თეატრის მმართველი ლია სულუაშვილი, რომელიც ამ წუთებში კულტურის სამინისტროში იმყოფება, ამბობს, რომ გადაწყდა, რომ დავით კლდიაშვილის 150 წლის იუბილესთან დაკავშირებით დიპლომანტებმა მის პიესების მიხედვით იმუშაონ: ”უკვე გავიცანი ირაკლი ძნელაძე. რომელ პიესაზე შეაჩერებს არჩევანს ჯერ ცნობილი არაა, მაგრამ ჩვენ მაქსიმალურად შევუწყობთ ხელს და შემოდგომით კიდევ ერთ დიდ კლასიკოსს გავიხსენებთ”.

მესხეთის სახელმწიფო დრამატული თეატრი წელს 7 პრემიერის გამართვას გეგმავს. ამათგან, ორი უკვე გაიმართა. ლია სულუაშვილის თქმით. გარდა პრემიერებისა და რეპერტუარში არსებული წარმოდგენებისა, თეატრი მაყურებელს ორ კაპიტალურად განახლებულ სპექტაკლსაც შესთავაზებს: ”ათვინიერებენ მიმინოს” და ”მერე რა რომ სველია, სველი იასამანი”.

[ნინო ნარიმანიშვილი, ახალციხე]