პრემიერაზე რეჟისორი ნუგზარ ლორთქიფანიძე მუშაობს. სპექტაკლი ალეჰანდრო კასონას პიესის მიხედვით დაიდგმება. პიესა რომანტიკული დრამაა, რომელიც რწმენაზე, ერთგულებაზე, სიყვარულსა და ზნეობაზეა.
”დიდი სიამოვნებით მინდა აღვნიშნო, რომ გარკვეული პერიოდის შემდეგ კვლავ მომიწია ამ თეატრთან მუშაობა, სადაც რამდენიმე სპექტაკლი უკვე მაქვს დადგმული. ასე რომ, ამჯერად ჩემი ამ ქალაქში ჩამოსვლა და მუშაობის დაწყება მეგობრებთან შეხვედრის ახალი საშუალებაა”, - ამბობს რეჟისორი ნუგზარ ლორთქიფანიძე.
სპექტაკლში მთავარ როლს მესხეთის სახელმწიფო დრამატული თეატრის მმართველი, მსახიობი ლია სულუაშვილი ითამაშებს. მონაწილეობას მიიღებენ ასევე მსახიობები მანუჩარ გოგოლაური, ლაშა ბუტულაშვილი, მანანა ბერიძე, ბაქარ ალავიძე, ლიაკო გოგიძე და სხვები.
ნუგზარ ლორთქიფანიძეს მესხეთის დრამატული თეატარის მსახიობებთან მრავალწლიანი სამუშაო გამოცდილება აქვს. მისი დადგმულია მესხეთის თეატრის სცენაზე: ”ჯერ დაიხოცნენ მერე იქორწინეს”, ”ვარსკვლავბიჭუნა”, ”ორი ბატონის მსახური” და ”მესამე სიტყვა”.
”ნუგზარ ლორთქიფანიძემ მესხეთის სახელმწიფო დრამატული თეატრის სცენაზე ბევრი სპექტაკლი დადგა და ჩვენ საკმაოდ დიდი ხნის შემოქმედებითი ურთიერთობები გვაკავშირებს. გარდა იმისა, რომ მას ძალიან წარმატებული სპექტაკლები აქვს დადგმული მთელი საქართველოს მასშტაბით, იგი მოღვაწეობდა კინომსახიობთა თეატრში და არაერთი ბრწყინვალე სპექტაკლი აქვს დადგმული. მიუხედავად იმისა, რომ ამდენი წლის მსახიობი ვარ, მე მის რჩევებს ყოველთვის ვითვალისწინებ და დღესაც გავითვალისწინებ”, - ამბობს მესხეთის სახელმწიფო დრამატული თეატრის მსახიობი მანანა ბერიძე.
სეზონის ბოლოს წინა პრემიერა მაყურებელმა გასულ კვირას იხილა. მესხეთის სახელმწიფო დრამატული თეატრის სცენაზე სპექტაკლი - ”ირინეს ბედნიერება”, დავით კლდიაშვილის პიესის მიხედვით, შოთა რუსთაველის თეატრისა და კინოს უნივერსიტეტის დიპლომანტმა რეჟისორმა ირაკლი ძნელაძემ დადგა.
დიპლომანტი რეჟისორები სპექტაკლებს სხვა ქალაქებშიც დგამენ. დავით ჩხარტიშვილი, ირაკლი ძნელაძე, თამარ პოპიაშვილი, ჯაბა პაპუაშვილი და მიხეილ ჩარკვიანი, სპექტაკლებს საქართველოს ხუთი ქალაქის: ქუთაისის, ახალციხის, თელავის, ჭიათურისა და ბათუმის მაყურებლებისთვის ამზადებენ.
პროექტის იდეა საქართველოს კულტურისა და ძეგლთა დაცვის სამინისტროს ეკუთვნის და მისი მიზანი რეგიონებში თეატრალური ცხოვრების გამოცოცხლება, რეპერტუარის გაზრდა-განახლება და თეატრის სფეროში ერთცენტრიანობის დამთავრებაა. სპექტაკლების დასადგმელად, თითოეულ თეატრს, საქართველოს კულტურისა და ძეგლთა დაცვის სამინისტრო 8 000 ლარს გადაურიცხავს.
მესხეთის სახელმწიფო დრამატულ თეატრში 45-ე სეზონი 26 აპრილს, სპექტაკლ ”ქეთევანით” გაიხსნა. ნუგზარ ლორთქიფანიძის თქმით, მესხეთის სახელმწიფო დრამატული თეატრის დასს შეუძლია, რომ მრავალი პიესის წინააღმდეგობები და სირთულეები გადალახოს: ”ისევე როგორც ყველა თეატრის დასი, ესეც არათანაბარია, ვიღაცა უფრო ნიჭიერია, ვიღაცა ნაკლებად ნიჭიერია და ვიღაცას საშუალო მონაცემები აქვს. თუმცა, თავისი გამორჩეული ინდივიდუალობა ყველას გააჩნია”.
[თამარ თოთაძე, ახალციხე]