მესხეთის თეატრში ახალი სეზონისთვის ემზადებიან

მესხეთის დრამატული თეატრი საქართველოს კულტურის სამინისტროდან სუბსიდიის სახით გასულ წლებში 150 ათასი ლარით ფინანსდებოდა. 2013 წელს კი სამინისტრომ დაფინანსება 50 ათასი ლარით გაუზრდა. გარდა ამისა, მესხეთის სახელმწიფო დრამატული თეატრისთვის ადგილობრივი ბიუჯეტიდან 60 ათასი ლარია გამოყოფილი. აღნიშნული თანხა სპექტაკლების დადგმისთვის არის გათვალისწინებული.

15 დეკემბერს ”მესხეთის თეატრს” საქართველოს კულტურისა და ძეგლთა დაცვის მინისტრი გურამ ოდიშარია ესტუმრა და ადგილზე გაეცნო იმ პრობლემებს, რაც მესხეთის თეატრს აწუხებს. თეატრის ადმინისტრაციაში ამბობენ, რომ მინისტრი დახმარებას დაჰპირდა.

- ”მინისტრტან ერთად შეხვედრაზე მუნიციპალიტეტის წარმომადგენლებიც იყვნენ. გამგებელმაც აღნიშნა, რომ თეატრს კაპიტალური რემონტი სჭირდება”, - ამბობს მესხეთის სახელმწიფო დრამატული თეატრის მმართველი ლია სულუაშვილი და ამატებს, რომ თეატრს ყველაზე მწვავედ გათბობისა და ტრანსპორტის პრობლემა აწუხებს. თუმცა, მიუხედავად აღნიშნული პრობლემებისა კონკრეტულად როდის დაიწყება სარემონტო სამუშაოების თეატრის ადმინისტრაციაში ჯერ არ იციან. მიუხედავად აღნიშნული პრობლემებისა ახალი სეზონისთვის მზადება უკვე დაწყებულია. რომელიც თებერვლის ბოლოს დაიწყება.

მესხეთის სახელმწიფო დრამატულ თეატრში ამბობენ, რომ 2013 წლის რეპერტუარი მრავალფეროვანი იქნება. მიმდინარე წელს მაყურებელს ექვსი პრემიერის საშუალება მიეცემა. პირველი სპექტაკლი შილერის ”ვერაგობა და სიყვარულს“ იქნება, რომლის რეჟისორი თეატრის ხელმძღვანელი ლია სულიაშვილია. ასევე, მიმდინარე წელს თეატრის სცენაზე მიხეილ ჯავახიშვილის ”კვაჭი კვაჭანტირაძე“, პოლიკარპე კაკაბაძის ”ყვარყვარე თუთაბერი“, გურამ დოჩანაშვილის ”ჰარალეთი“ და დაიდგმება.

გარდა პრემიერებისა, მაყურებელს მივიწყებული სპექტაკლების ნახვის შესაძლებლობაც მიეცემა. ლია სულიაშვილი ამბობს, რომ ძველი სპექტაკლების აღდგენა დაიწყება: ”ააღდგება სპექტაკლი ”ღმერთო დაგვიფარე ჩვენ და ადამიანები“, ასევე ძალიან გვინდა, რომ აღვადგინოთ საბავშვო სპექტაკლი ”ნაცარქექია”.
მიმდინარე წელს თეატრს რამდენიმე ახალი მსახიობიც დაემატება.

ლია სულიაშვილი მოითხოვს, რომ მათი მუშაობა თიატრმცოდნეებმა შეფასონ და მათგან ჯანსაღი კრიტიკაც მიიღონ.

- ”ჯანსაღი კრიტიკა ადამიანს ზრდის. რამდენი ხანია ვითხოვთ, რომ თეატრმცოდნეები ჩამოვიდნენ და როგორც იქნა მიზანს მივაღწიე. გვინდა, რომ ჩამოვიდნენ და შეგვაფასონ. იმედია მოვლენ და ნახავენ ჩვენს, როგორც ახალ ასევე ძველ სპექტაკლებსაც,“ - ამბობს თეატრის მმართველი.

გასულ წელს მესხეთის სახელმწიფო დრამატულმა თეატრმა მაყურებელს ცხრა პრემიერა შესთავაზა.

[ნინო ბერიძე, ახალციხე]