მესხეთის თეატრის მმართველი ცვლილებებისთვის მზადაა

”ამ საკითხზე კულტურისა და ძეგლთა დაცვის მინისტრს ვესაუბრე. თუ კი ისეთი ხელმძღვანელი მოვა, რომელმაც თავისი საქმე კარგად არ იცის და არ იშრომებს დღედაღამ, სამხატვრო ხელმძღვანელის ინსტიტუტი არ გაამართლებს”, - ამბობს მესხეთის სახლემწიფო დრამატული თეატრის მმართველი ლია სულუაშვილი, რომელიც წლებია სამხატვრო ხელმძღვანელის ფუნქციასაც ითავსებს.

მისივე თქმით, კანონი, მისი დამტკიცების შემთხვევაში, შესაძლოა ყველა თეატრს არ მოერგოს, რადგან ’ყველა თეატრს თავისი პრობლემა აქვს’.

„პროფესიული თეატრების შესახებ“ კანონპროექტის ავტორი ნუკრი ქანთარიაა. კანონპროექტის თანახმად, სახელმწიფო თეატრში მმართველის ინსტიტუტი გაუქმდება და დაინერგება სამხატვრო ხელმძღვანელისა და დირექტორის ინსტიტუტი, რომელიც ადმინისტრაციულ და ფინანსურ საკითხებზე იქნება პასუხისმგებელი.

”იქნება საკმაოდ კონკურენტუნარიანი გარემო, სამხატვრო ხელმძღვანელის არჩევის წესი იქნება ახალი, რომლის დებულებასაც კულტურის სამინისტრო და სარეკომენდაციო საბჭო განსაზღვრავს. ეს არის შემოქმედებითი პასუხისმგებლობის აღება შემოქმედებით დაწესებულებაზე და ასევე, ვფიქრობ, რომ ამ კანონპროექტის ძალაში შესვლის შემდეგ სამხატვრო ხელმძღვანელის ინსტიტუტი თეატრში გაძლიერებული სახით დაბრუნდება", - ამბობს ქანთარია.

რა პოზიციაზე დარჩება მომავალში, ლია სულუაშვილს დაკონკრეტება უჭირს.

“ყველაფრისთვის მზად ვარ. იმისთვისაც, რომ გამიშვან და იმისთვისაც, რომ დამტოვონ’, - ამბობს იგი.

კანონპროექტს „პროფესიული თეატრების შესახებ“ 19 მარტს დეპუტატებმა მეორე მოსმენით დაუწირეს მხარი.

[ნინო ზედგინიძე, ახალციხე]