![”დამოუკიდებელი ექსპერტთა კლუბმა” წიგნის პრეზენტაცია გამართა ”დამოუკიდებელი ექსპერტთა კლუბმა” წიგნის პრეზენტაცია გამართა](/uploads/posts/2012-06/1340968708_prezentacia-_01.jpg)
შეხვედრა ”ახალციხის დემოკრატიული ჩართულობის ცენტრში” შედგა და მას ადგილობრივი მედია-საშუალებებისა და პოლიტიკური პარტიების წარმომადგენლები ესწრებოდნენ.
აღნიშნული კრებული უკვე მესამე გამოცემაა, რომელიც სახელმწიფო უსაფრთხოების შინაგან ასპექტებს, გლობალური პროცესების მიმოხილვას უსაფრთხოების კუთხით, ეკონომიკურ უსაფრთხოებას, ასევე დემოგრაფიული უსაფრთხოების საკითხებს, ეროვნულ უმცირესობათა ინტეგრაციის პრობლემებს საზოგადოებაში და ფინანსური და ეკონომიური პროცესების შეფასებას ეძღვნება.
”დამოუკიდებელი ექსპერტთა კლუბის” პრეზიდენტის სოსო ცისკარიშვილის თქმით, კრებულში საკმაოდ ვრცლად არის წარმოჩენილი ადამიანთა უფლებების სფეროში არსებული ვითარება, რაც ერთ-ერთი მნიშვნელოვანი საკითხია: ”მკითხველს აქვს საშუალება გაეცნოს საკითხებს დემოკრატიზაციაზე, კანონიერებასა და სამართლიანობაზე”.
კრებულში გამოთქმულია აზრები, რომელიც 45 ცნობილ პიროვნებას ეკუთვნის. ესენი არიან სხვადასხვა ეპოქის შვილები, სხვადასხვა ეროვნებისა და პროფესიის წარმომადგენლები.
- ”აღნიშნული გამონათქვამები საშუალებას გვაძლევს შევადაროთ ჩვენი წარმოდგენა დემოკრატიაზე და ქართული დემოკრატიის რელობა იმ შეფასებებთან, რომელიც მსოფლიოში არსებობს”, - ამბობს სოსო ცისკარიშვილი.
”დამოუკიდებელი ექსპერტთა კლუბის” პირველი კრებული 2009 წელს გამოვიდა. აღნიშნულ კრებულში შეფასებული იყო 2008 წლის სახელმწიფოებრივი და სისტემური კრიზისი, ასევე, ომის დროს საქართველოს ხელისუფლების ქმედების სამართლებრივი შეფასება.
- ”აღნიშნული კრებული არაერთხელ იქნა გამოყენებული საერთაშორისო ექსპერტიზის მიერ, რომელიც სრული დუმილით იქნა გვერდავლილი ქართული ხელისუფლებისგან. მათ არ გააჩნდათ საწინააღმდეგო არგუმენტი ამ შეფასებისა”, - ამბობს ცისკარიშვილი.
მომდევნო კრებული 2010 წელს გამოვიდა, რომელიც უკვე ომის შემდგომ პერიოდს ასახავდა. კრებულში ასევე შეფასებული იყო 2009 წელს განვითარებული მოვლენები.
- ”სამომავლოდ დაგეგმილი გვაქვს კიდევ ერთი კრებულის გამოცემა, სადაც აღწერილი იქნება 2012-2013 წლებში დაგეგმილი არჩევნების შედეგები. რა იყო, რა მოხდა, როგორი იყო წინასაარჩევნო მზადება, სად შეინიშნებოდა საფრთხე სამართლიანი არჩევნებისთვის, რეალობაში რა განხორციელდა და რა შედეგი დადგა”, -ამბობს ”დამოუკიდებელი ექსპერტთა კლუბის” პრეზიდენტი.
სამივე კრებული ინგლისურ ენაზეა ნათარგმნი. ბოლო კრებულზე დამოუკიდებელი ექსპერტთა კლუბის წევრები სამი თვე მუშაობდნენ. კრებულის ავტორები არიან არა მხოლოდ ექსპეტთა კლუბის წევრები, არამედ მოწვეული ექსპერტებიც.
”დამოუკიდებელი ექსპერტთა კლუბი” 2008 წელის 15 ოქტომბერს დაფუძნდა. კლუბი აერთიანებს პოლიტიკის, ეკონომიკის, სამართლის, სოციალური სფეროს, უსაფრთხოების საერთაშორისო ურთიერთობათა, კონფლიქტოლოგიის, დემოკრატიული პროცესებისა და ქვეყნისთვის სხვა აქტუალურ საკითხების ანალიზში სისტემატურად ჩართული დამოუკიდებელი ექსპერტების ძალისხმევას.
კლუბის ძირითადი მიზანია აქტიურად ჩაერთოს საქართველოსთვის მნიშვნელოვანი მოვლენების შეფასებათა პროცესში, გახადოს იგი საჯარო და მასში თანამონაწილეობის საშუალება შესთავაზოს დაინტერესებულ საზოგადოებას.
[მანანა სარაშვილი ახალციხე]